Nin ganacsade ah oo lagu dilay Koofur Afrika

Isniin, February 09, 2009(HOL): Habeenkii xalay ahaa ayaa kooxo hubaysan oo u dhashay dalkan Koonfur-Africa, isla markaana  burcad ahaa waxay dil toogasho ah ku dileen muwaadin soomaliyeed oo ku sugnaa dukaankiisa oo ku yiilay tuulada Delf ee magaaladda Xeebta ah ee Cape Town.
 
ALLAAH HA U NAXARIISTO Marxuum Axmed Abuukar Xaaji Xuseen oo lagu naa-neesi jiray (Axmedey Goobe) da'diisana la iigu sheegay 38-Sano jir ayaa lagu dilay magaaladda xeebta ee Cape Town xili u ku guda jiray shaqadiisa ganacsi.
 
Marxuumkan ayaa waxaa soo weeraray kooxo burcaad ah kadib-na dukaankii  uu ku suganaa ayay si lama filan ugu soo galeen, waxayna ku bilaabeen handadaad, Isaguna wuxuu ku yidhi'' xiligaasi fadlan ha idilina ee qaata wixii aad rabtaan. Hasee-yeshee kooxihii burcadda ahayd ee weerarka soo qaaday ayaa warkaasi u cuntami waayay markiiba waxay ka toogteen madaxa isagoo halkaasi ku nafbaxay.
 
Inta kadib-na burcad ayaa markiiba dukaanka u geysatay dhac  iyo alaab gurasho Iyagoo qaatay wixii yiilay dukaanka Isla markaana waxay ku baxsadeen gaari nooca Toyota ah oo ay soo dhigteen meel dukaanka u dhow.
 
Arintani dilka waxaa cambaareeyay dhammaan ganacsatada Soomaliyeed ee ku dhaqan dalkani K/Africa waxayna si aan kala har lahayn u canbaareeyeen falalka lagu bartilmaameedsanayo muddooyinkan danbe Ganacsatada Soomaliyeed ee ganacsiga naf-la-caariga ah ku haysta dalkan.
 
Si kastaba ha ahaatee, dilkan loo geystay muwaadinkan Soomaaliyeed ayaa noqonaya kii 7-aad ee sanadkan 2009-ka loogu geysto ganacsatada Soomaaliyeed ee nolosha iyo nabadda u soo  doontay dalka Koonfur-Africa.
 
Hassan YeeY
[email protected]
Johannesburg, South Africa