Khamiis, December, 5, 2024 (HOL) - Maxkamadda Ciidamada Puntland ayaa dacwad ku soo oogtay Cali Maxamuud Saney, oo kamid ahaa Al-Shabaabkii ka howlgali jiray Galgala.
Ninkaan ayaa lagu eedeeyay inuu ka qeyb qaatay dagaallo ka dhacay Buuraha Galgala ee gobolka Bari, kuwaas oo ciidamada Puntland loogu geystay khasaaro isugu jira dhimasho iyo dhaawac.
Cali Maxamuud Saney, ayaa diiday eedeymahan, wuxuuna sheegay inuu Alshabaab kasoo goostay, islamarkaasna uu doonayay inuu dib ula midoobo qoyskiisa oo deggen gobolka Gedo.
Wuxuu sheegay inuu 8 sano ka hor ku biiray kooxda Al-Shabaab, kadib markii lagu tashkiiliyay. Wuxuu sheegay in muddadaas uu ku sugnaa Buuraha Galgala, isagoo beeniyay inuu dagaal ka qeyb galay.
Saney ayaa sidoo kale sheegay in markii uu ku jiray gacanta Al-Shabaab uu la kulmay xarig iyo dhibaatooyin badan, taasoo keentay inuu go'aansado inuu ka baxsado gacanta Alshabaab.
Wuxuu sheegay in lagu qabtay Kantraoolka Waqooyi ee magaalada Gaalkacyo, xilli uu kusii magaalada Garbahaareey ee gobolka Gedo.
Maxkamadda Puntland ayaa hadda gacanta ku haysa kiiskan, iyadoo sii wadeysa baaritaanka iyo dhageysiga dacwada.