Axad, January 19, 2025 (HOL) - Ciidamada
xoogga dalka Soomaaliyeed oo kaashanaya kuwa dadka deegaanka ayaa
howlgal qorsheysan oo ka dhacay duleedka magaalada Baledweyne, gaar
ahaan agagaarka deegaanka Baardheere ku qabtay gaari hub u siday kooxda
Al-shabaab.
Gaariga
howlgalka lagu soo qabtay oo noociisu yahay Suksuki ayaa siday hub ka
kooban 13 qori oo ah noocaada Soomaalidu u taqaano Ak47, kuwaas oo lagu
soo bandhigay xarunta Taliska Militariga gobolka Hiiraan.
Taliyaha
guutada 5-aad qeybta 27-aad ee ciidamada xoogga dalka Maxamuud Xasan
Ibraahim Baakaay oo shir jaraa’id qabtay ayaa sheegay in laba maalin ka
hor hayeen xogta gaarigan hubka lagu qabtay.
“Waxa
gadaasheyda safan waa qoryo laga soo qabtay argagixisada, gaarigaan
ayaa lagu siday, waana cusub yahay baabuurka iyo qoryaha saaran, mudo
laba maalmood ah ayaan haynay xogta hubkan, uuna yahay hub u gudbaayo
argagixisada, kadibna gacanta ayaa lagu soo dhigay” ayuu yiri Taliye
Baakaay.
Taliyaha ayaa
sidoo kale xusay inuu baxsaday darawalkii waday gaarigaan lagu qabtay
hubka, islamarkaana ay la wareegeen gaariga iyo hubka uu siday.
“Gaariha
iyo hubkan uu siday dowladda ayaa la wareegtay amarka lagu soo qabtay
anaga ayaa bixinay, waxuuna u socday waxay ahayd argagixisada” ayuu yiri
Taliyaha guutada 5-aad qeybta 27-aad ee ciidamada xoogga dalka Maxamuud
Xasan Ibraahim Baakaay.
Howlgalkaan
lagu soo qabtay gaariga hubka u siday Al-shabaab ayaa kusoo aadaya,
iyadoo dhawaan ciidanka dowladda Fedaraalka Soomaaliya si rasmi loogu
wareejiyay amniga guud ee magaalada Baledweyne iyo deegaanada
hoosyimaada.