Afhayeenka Xukuumadda Federaalka Soomaaliya Cabdi Xaaji Goob-doon oo wareegtadaas saxaafadda u aqriyay ayaa wuxuu sheegay in Guddiga KMG ah ee loo dhisay maamulka Gobolka Banaadir oo 10 xubnood ka kooban uu xilka heyn doono muddo 15 maalmood gudahood ah, iyadoo mudadaasna uu ku soo diyaarin doono maamul ay dadka deegaanka soo doorteen uu Gobolka Banaadir yeesho.
Cabdi Xaaji Goob-doon waxaa uu intaas ku daray in wareegtada uu soo saaray Madaxweynaha xilkii ay hayeen looga qaaday Maamulkii hore ee Gobolka Banaadir ee uu Guddoomiyaha ka ahaa Maxamed Cumar (Maxamed Dheere).
Afhayeenka waxaa uu sheegay in madaxweyne C/llaahi Yuusuf uu Guddiga KMG ah u magacaabay Gobolka Banaadir kadib markii sida uu yiri uu arkay baahida loo qabo in la sameeyo maamul la soo doortay oo ku yimid rabitaanka dadka ku nool Gobolka Banaadir
Xubnaha Guddiga KMG ah ee Gobolka Banaadir
Ibraahim Shiikh Muxyadiin Guddoomiyaha Guddiga
C/qaadir Maxamuud Walaayo Ku xigeen
Xasan Maxamed Cusmaan Xaaji Xubin
Inj C/llaahi Cali Gadaafey Xubin
Maxamed C/llaahi Xaamud Xubin
Inj. Maxamed Jaamac Kulmiye Xubin
Xuseen Caddow
C/llaahi Cabdulle Wehliye Xubin
Suufi Muudey
Saciid Jaamac
Nuur Maxamed Xuseen Xubin
Xilka Guddiga cusub ayaa noqon doona xoojinta hab-sami u socodka howlaha Maamulka Gobolka Banaadir tan iyo inta laga dhisayo hoggaamin fulineed oo cusub, abaabulidda hoggaaminta iyo xulashada Golaha Wada-tashiga Deegaanka, Doorashada Maamulka cusub, dejinta shuruudaha ka mid noqoshada Golaha Wada-tashiga.
Xubnihii hore ee maamulka Gobolka Banaadir ayaa wareegtada uu soo saaray Madaxweynaha lagu faray in ay xilkooda iyo dhamaan wixii hanti ah ee uu gobolka leeyahay ay ku wareejiyaan Guddiga cusub, iyadoo Hay’adaha Dowliga iyo kuwa aan Dowliga ahayn-na laga codsaday in ay wareegtada Madaxweynaha u hoggaansamaan, isla markaana ay la shaqeeyaan Guddiga cusub.
Haddaba Dadka isu soo sharaxaya Maamulka cusub ee Gobolka Banaadir ayaa waxaa hor-taalla shuruudo ay ka mid yihiin:
In ay Muwaadiniin Soomaali ah yihiin
In ay yihiin kuwo xushmeynaya Axdiga KMG ah, iyo Madaxda Dalka
In ay yihiin kuwo taageersan Barnaamijka Dib u heshiisiinta ee ay Dowladda waddo
In aysan ku lug lahayd arrimo dagaal-ooganimo iyo Xag-jirnimo diimeed
In ay yihiin kuwo nadiif ka ah ku xadgudubka Xuquuqda Aadanaha, isla markaana aysan ku lug lahayn falal dembiyeedyo iyo kuwo cadaalad dararo
In ay yihiin kuwo shacbiga dhexdiisa ku leh xushmad iyo qadarin, maamulkoodana lagu kalsoonaan karo.
Guddiga ay maanta magacawday Dowladda Federaalka Soomaaliya ayaa wuxuu qeyb ka yahay fulinta qodob ka mid ah heshiis ay madaxda sare ee Dowladda Federaalka ku soo gaareen Magaalada Addis Ababa ee Dalka Itoobiya kadib markii ay madaxweyne C/llaahi Yuusuf iyo Ra’iisal wasaare Nuur Cadde ay isku qabteen xil-ka-qaadis uu Ra’iisal Wasaaraha ku sameeyay Guddoomiyihii Maamulka Gobolka Banaadir Maxamed Cumar Xabeeb (Maxamed Dheere).
Salaad Iidow Xasan (Xiis), Hiiraan Online