Hiiraan Online

Axad, January 5, 2025 (HOL) - Ciidamada dowladda Fedaraalka Soomaaliya oo kaashanaya kuwa dowladda Mareykanka ee dhanka cirka ah ka taageera ayaa howlgal khasaare xoogan lagu gaarsiiyay kooxda Al-shabaab ka fuliyay deegaanka Beerxaani ee gobolka Jubbada Hoose.

Howlgalka ayaa ahaa mid lagu beegsaday xubno ka tirsan kooxda oo isku aruursanaayay deegaanka Beerxaani oo qiyaas ahaan 35 KM dhanka Waqooyi Galbeed ka beegan magaalada Kismaayo.

Warsaxafadeed kasoo baxay dowladda Soomaaliya ayaa lagu sheegay in howlgalka lagu dilay ilaa 10 xubnood oo ka tirsan kooxda, islamarkaana aysan jirin wax khasaare ah oo soo gaaray rayidka.

"Hawlagalkan lagu burburiyay koox ka tirsan Khawaarijta oo soo abaabulay isla markaana damacsanaa inay soo qaadaan weerar qorsheysan ayaa waxaa looga hortagey waxyeeladii ay doonayeen inay geystaan" ayaa lagu yiri Warsaxafadeedka kasoo Wasaaradda warfaafinta Soomaaliya.

Warsaxafadeedka ayaa sidoo kale lagu sheegay in ciidanka dowladda Soomaaliya iyo kuwa dowladda Mareykanka ay ka go'an tahay ciribtirka iyo ka hortaga waxyeelada ay shacabka Soomaaliyeed la damacsan yihiin.

Hoos ka akhriso Warsaxafadeedka oo dhameystiran:-