1/8/2025
Today from Hiiraan Online:  _
Wararka Maanta- Axad, Jan 5 , 2025
Ra'iisul Wasaare Xamsa oo xilalka u kala wareejiyay Bashiir Goobe iyo Khadiija Makhzumi

Axad, January 5, 2025 (HOL) - Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa maanta xilalka u kala wareejiyey Wasiirrada Wasaaradaha Deegaanka iyo Isbeddelka Cimilada iyo Qoyska iyo Horumarinta Xuquuqul Insaanka.

Ra'iisul Wasaare Xamsa ayaa shaaca ka qaaday in Wasaaradda Deegaanka iyo Isbeddelka Cimilada ay kaalin muhiim ka qaadanayso dadaalka adduunyadu ugu jirto in xal waara loo helo saameynta isbeddelka Cimilada iyo wax-ka qabashada iyo maareynta dhibaatooyinka deegaanka.

Ra'iisul wasaaraha ayaa xusay dhinaca kale in Wasaaradda Qoyska iyo Horumarinta Xuquuqul Insaanka ay fure u tahay ilaalinta xuquuqda bulshada Soomaaliyeed, gaar ahaan haweenka iyo carruurta.

Xamsa ayaa carabka ku adkeeyay baahida loo qabo wada-shaqeyn dhow oo dhex marta wasaaradaha, si loo xaqiijiyo ujeeddooyinka Xukuumadda ee ku saleysan horumarinta deegaanka, isbeddelka cimilada, kobcinta xuquuqda aadanaha, iyo taageerada bulshada nugul.

Ra'iisul Wasaaraha ayaa labada Wasiir uga mahadceliyey shaqadii muhiimka ahayd ee ay soo qabteen, wuxuunna kula dardaarmay inay shacabka Soomaaliyeed ugu adeegaan si hufan.