Talaado, Maarso, 5, 2024 (HOL) - Ilaa 37 qof ayaa u dhintay cudurka daacuunka oo Soomaaliya ka dilaacay tan iyo bishii Janaayo, taasoo muujineysa saamaynta cudurka, sida ay sheegtay wasaaradda caafimaadka Soomaaliya.
Wasaaradda caafimaadka iyo adeegga bulshada ayaa sheegtay in ay sare u kaceen kiisaska daacuunka, iyadoo wadar ahaan la soo sheegay 3,365 xaaladood.
“Laga soo bilaabo bishii Janaayo 2024, degmooyin dhowr ah oo Soomaaliya ka tirsan ayuu si weyn u saameeyay cudurka daacuunka, degmada ugu badan ee laga soo sheegay waa Beledweyne, taasoo ka dhigan 604 xaaladood (18 boqolkiiba wadarta guud),” ayay wasaaraddu ku tiri warbixinteedii ugu dambeysay ee cudurrada faafa.
Wasaaraddu waxay sheegtay in cudurka daacuunka ee ka dilaacay Soomaaliya ay sabab u tahay tirada sii kordhaysa ee dadka aan haysan biyo nadiif ah iyo nadaafad wanaagsan.
Intaa waxaa dheer, dalka waxaa soo maray daadad ka dhashay El Nino, kaas oo saameeyay in ka badan 2.5 milyan oo qof, taasoo keentay in 1.2 milyan oo qof ay ka barakacaan guryahooda.