Arbaco, January, 31, 2024 (HOL) - Madaxweynahii hore ee Soomaaliya Maxamed Cabdullaahi Farmaajo ayaa war qoraal ah oo uu soo saaray bartiisa Facebook kaga hadlay arrimo badan oo khuseeya xaalada dalka.
Farmaajo ayaa ugu horeyn sheegay in kulankii dhawaan uu madaxweyne Xasan Sheekh kula qaatay magaalada Doxa inuu kala hadlay muhiimadda ay leedahay inuu hoggaamiyo wadatashi heer qaran ah oo lagu wajahayo xaaladaha taagan ee la xiriira wax ka beddelka dastuurka, qaab dhismeelka maamul ee dalka iyo khataraha ku gedaaman madaxbanaanida iyo midnimada dalka.
Wuxuu sidoo kale Farmaajo qoraalkiisa ku sheegay inuu soo dhaweeynayo shirka wada tashiga ee uu iclaamiyay madaxweynaha maamulka Puntland Saciid Cabdullaahi Deni, isagoona ugu baaqay madaxdii hore iyo kuwa hada iney ka wada qayb galaan shirkaas.
“Waxaan soo dhoweynayaa shirka Garoowe ee looga tashanayo arimaha hortebinta u leh dalka, aniga oo madaxdii hore ee dalka iyo kuwa xilka haya ugu baaqaya in ay ka qayb galaan shirkaas oo ah mid muhiimad weyn u leh dalka oo xilligan maraya marxalad xaasaasi ah” ayuu Farmaajo ku yiri qoraalkiisa.
Madaxweynahii hore ee Soomaaliya ayaa sidoo kale qoraalkiisa fariin culus ugu diray Baarlamaanka Soomaaliya oo uu ka dalbaday iney ka war sugaan shirkaasi, islamarkaana aysan qaadin talaabooyin aanan la isku waafaqsaneyn.
“Labada Gole ee Baarlamaanka Jamhuuriyadda Federaalka Soomaaliya iyo Xukuumadda waxaan u soo jeedinayaa in inta uu shirkaasi socdo ay ka fogaadaan tallaabooyinka aan la isku waafaqsanayn ee la xiriira laalidda dastuurka iyo wax ka beddelka hannaanka maamul ee dalka. Ma jirto xilli uu dalkeennu uga baahi badan yahay in aynu u midowno ka hortagga xasillooni darro gudaha ka timaadda iyo sidii aynu dadkeenna iyo dalkeenna uga difaaci lahayn khatarta dibadeed ee aynu wajahayno, meelna la iska dhigo tallaabooyinka kala qaybsanaanta siyaasadeed u horseedaya dalka.” ayuu yiri Farmaajo qoraalka uu soo saaray.
Hadalkaan kasoo yeeray Farmaajo ayaa kusoo beegmaya, iyadoo madaxweynaha dib loo doortay ee Puntland Saciid Deni uu iclaamiyay shir ay dhawaan isugu imaanayaan Garoowe madaxda sare ee dalka iyo kuwa maamul goboleedyada, kaasoo oo looga hadli doono arrimaha xasaasiga ah ee ka taagan dalka.