9/24/2023
Today from Hiiraan Online:  _
Wararka Maanta- Arbaco, Sept 13, 2023
Faysal Cali Waraabe: Waa in aynu sharafteeni soo ceshanaa oo xuduudeenii tagnaa
 

Arbaco, September, 13, 2023 (HOL) - Guddoomiyaha xisbiga mucaaradka Somaliland UCID Faysal Cali Waraabe, ayaa sheegay in ay muhiimtahay in Somaliland tagto xuduudii Ingriiska.

Waxa uu sheegay in xuduudihii isticmaarku u sameeyay qaarada Afrika, aan la badali karin, isla markaana ay sharci yihiin.

"Xuduudaha lama badali karo, sharciga Afrika wuxuu sheegayaa in xuduudaha Afrika ay yihiin kuwii isticmaarka, sharci inoo diidaya in aynu xuduudeenii tagna ma jiro" ayuu yidhi Faysal.

Waxa uu sheegay in Somaliland ahayd Soomaalidii ugu horaysay ee xornimo qaadata, isla markaana 35 dowladood ay aqoonsadeen wakhtigaa, waxa kale oo uu sheegay in dagaaladii Jamhuuriyadii Soomaalidu ku qaaday Itoobiya ay fashilmeen aduunkuna ka diiday in ay badasho xuduudii gumaystaha.

Waxa kale uu sheegay in waddamo badan oo Afrikan ah iyo carbeed xornimadii kadib ay isku biireen hadana ay kala noqdeen, taasi oo uu sheegay in midnimadii 1960kii anay ahayn mid muqadas ah.

Isaga oo ka hadlayay jabkii ciidanka Somaliland kasoo gaadhay dagaalkii 25 August, ayuu sheegay in khilaafkii siyaasadeed uu ciidanka saameeyay, taasi oo uu sheegay in hada laga gudbay, oo laysku raacay nidaam doorasho oo laysla ogolyahay.

"Waa in aan sharafteenii soo celinaa, xuduudeenii tagnaa, oo aynu ilaalinaa nabadgalyada dagaalka, oo maxaabiisbaa la qawr qawracayaa, waxa aynaan samayn, waligeena maynaan samayn" ayuu yidhi Faysal.












Click here
9/13/2023 2:17 PM EST
Arbaco, September, 13, 2023 (HOL) - Garaad Cabdirisaaq Garaad Soofe, ayaa ka digay dagaal ay Somaliland ku qaado Laascaanood, isaga oo sheegay in hadii ay dhacdo Somaliland cawaaqib xun kala kulmi doonto.

9/13/2023 1:31 PM EST
Arbaco, September, 13, 2023 (HOL) - Somaliland oo markale ka hadashay kooxihii xagjirka ahaa ee ay sheegtay in ay Laascaanood soogaleen, ayaa sheegtay in ay ka yimaadeen badhtamaha Soomaaliya, Puntland iyo Buuhoodle.

9/13/2023 10:22 AM EST
Arbaco, September, 13, 2023 (HOL) - Warsaxafadeed kasoo baxay Wasaaradda Warfaafinta Xukuumadda Fedaraalka Soomaaliya ayaa lagu shaaciyay in 30 ka mid ah kooxda Al-shabaab lagu dilay howlgalo ay iska kaashadaan ciidanka dowladda iyo Saaxiibada Caalamiga ah oo ka dhacay gobolka Galgaduud.

9/13/2023 9:39 AM EST
Arbaco, September, 13, 2023 (HOL) - Wararka ka imaanaya gobolka Galgaduud ayaa sheegaya in duqeyn ka dhacday inta u dhaxeysa deegaanada Ceel garas iyo Ceel lahelay in lagu dilay xubno ka tirsan kooxda Al-shabaab oo isugu jira maleeshiyaad iyo horjoogahooda.

9/13/2023 7:30 AM EST
Arbaco, September, 13, 2023 (HOL) - Madaxweyne ku xigeenka maamulka Puntland, Axmed Cilmi Cismaan Karaash, ayaa soo dhoweeyay magacaabidda xog- hayayaasha cusub ee SSC-Khaatumo.

9/13/2023 6:58 AM EST
Arbaco, September, 13, 2023 (HOL) - Wasaaradda gaashaandhigga Soomaaliya ayaa sheegtay in howlgal saakay ka dhacay degaano katirsan gobolka Baay lagu qaarijiyay madaxii kooxda Alshabaab u qaabilsan arrimaha maaliyadda ee gobolka Bay iyo saraakiil kale.

9/13/2023 2:47 AM EST
Arbaco, September, 13, 2023 (HOL) - Wararka ka imaanaya deegaanka Ceel garas ee gobolka Galgaduud ayaa sheegaya in kooxda Al-shabaab ay qarax ku burburiyeen Ceel biyoodkii ugu weyna deegaankaas.

9/13/2023 2:18 AM EST
Arbaco, September, 13, 2023 (HOL) - Warar dheeraad ah ayaa kasoo baxaya qarax xoogan oo saakay ka dhacay degmada Deyniile ee magaalada Muqdisho, kasoo jugtiisa laga maqlay qaar ka mid ah degmooyinka gobolka Banaadir.

9/13/2023 1:29 AM EST
Arbaco, September, 13, 2023 (HOL) - Hay’adda Nabad Sugidda NISA ayaa shaacisay magacyada iyo sawirrada qaar ka mid ah horjoogeyaashii Shabaab ee lagu dilay hawlgalladii ugu dambeeyay oo ay fuliyeen ciidanka dowladda oo garab ka helaya Saaxiibada Caalamka.

9/13/2023 1:20 AM EST
Arbaco, September, 13, 2023 (HOL) - Maamulka goboleedka Galmudug ayaa sheegay in kooxda Alshabaab ay afduubteen dadkii shacabka ahaa ee ku noolaa degaanadii dhawaan laga xoreeyay ee gobolka Galgaduud.