Axad, Maarso, 6, 2022 (HOL) - Warar dheeraad ah ayaa kasoo baxaya kulan xalay magaalada Baledweyne ku dhexmaray madaxda maamulka Hirshabeelle oo kala ahaa madaxweynaha, ku xigeenkiisa iyo Musharixiinta u taagan u tartamida 11 kursi oo lagu wado in dhawaan lagu doorto magaalada Beledweyne.
Kulankaan ayaa la sheegay in looga hadlay amniga doorashada, ayadoo madaxda Hirshabeelle ay soo jeediyeen in dhamaan hubka iyo gaadiidka dagaal banaanka looga bixiyo xerada Lamagalaay oo ah goobta ay ka dhaceyso doorashada, islamarkaana musharaxa walba loo ogolyahay ilaalo kooban.
Masuuliyiinta ugu sareysa Hirshabeelle ayaa Musharaxiinta ay kulanka la qaateen waxay u cadeeyeen iney dhaceyso doorasho daahfuran oo si nabad ah ku dhacda, islamarkaana aysan jirin cid gaar ah oo kursi loo xirayo.
"Madaxweynaha ayaa musharaxiinta u sheegay inay u diyaar garoobaan doorasho daahfuran oo si nabad ah ku dhacda, waxa uuna balanqaaday inaysan dhici doonin in kursi loo xiro cid gaara. Ugu dambeyn Madaxweynaha ayaa musharaxiinta kula dardaarmay inay hay'addaha amniga kala shaqeeyaan nabadgalyada Magaalada Baledweyne" ayaa lagu yiri qoraal kasoo baxay Madaxtooyada Hirashabeelle.
Gabagabadii wali lama oga go'aanka dhanka Musharaxiinta u taagan kuraasta taala Baledweyne iney aqbaleen hadalka kasoo baxay madaxda Hirshabeelle ee ah in hubka iyo ciidanka badan ay kala baxaan gudaha xerada lamagalaay.
Xubnaha Musharixiinta ee Xalay kulanka la qaatay madaxda Hirshabeelle ayaa gaarayay tiro ahaan ku dhawaad lixdan Musharax oo dhamaantood u taagan 11 kursi oo dhawaan doorashadooda la shaaciyay.
Dadka ku dhaqan Baledweyne ayaa welwel iyo walaac xoogan ka qaba in doorashada 11 kaan kursi ay sababaan dagaalo qarara oo dhiig badan ku daadan karo, maadama Mushaxiinta kuraastaan dooneysa ay yihiin kuwa aad u farabadan, islamarkaana hubeysan.