Booliska oo howlgallo ka wada dhammaan degmooyinka gobolka Banaadir
Isniin, Maarso, 28, 2022 (HOL) -Saraakiisha amniga maamulka gobolka Banaadir ayaa xalay hoggaamineysay howlgallo amni xaqiijin ah oo laga sameynayay degmadda howlwadaag iyo degmooyin kale oo ka tirsan gobolka.
Saraakiisha hoggaamineysay howlgalka waxaa kamid ahaa taliye
ku-xigeenka qeybta Waliyow Cadde Gaashaanle Isxaaq Maxamed Ciise, taliyaha
nabad-sugida degmadda howlwadaag iyo taliyaha saldhiga howlwadaag.
Ciidanka booliska ayaa howlgalka kusoo qabtay dhallinyaro,
iyagoona mid mid u baarayay guryaha.
Taliye ku-xigeenka qeybta Waliyow Cadde Gaashaanle Isxaaq
Maxamed Ciise, ayaa howlgalka kaddib saxaafadda u sheegay in howgalladaasi kuwo lamid ah ay
ka socdaan dhammaan degmooyinka gobolka Banaadir, maadaama bisha Ramadan ay soo
dhowdahay.
“Howgalkan waxaa uu daba socdaa xaqiijinta amniga caasimada maadaama
bisha Ramadan ay soo dhowdahay, isla markaana madaxda dalka, gaar ahaan Ra’iisul
Wasaaraha iyo madaxweynaha ay amar ku bixiyeen dardar-gelinta sugida amniga
dalka”, ayuu yiri taliyaha.
Madaxweynaha Jamhuuriyadda Federaalka Soomaaliya Maxamed
Cabdullaahi Farmaajo oo maalin ka hor kulan la qaatay guddoonka gobolka
Banaadir iyo taliyayaasha ciidamada, ayaa sheegay in la kordhiyo howlgallada iyo
feejignaanta, maadaama dalku uu ku jiro xilli doorasho, loona diyaar garoobayo
bishii barakaysan ee Ramadaan.
Lix qof ayaa ku dhinatay weerar ay Al-Shabaab 23-kii bishan ku
qaadeen garoonka diyaaraha ee magaalada Muqdisho. Dhinaca kale 48 qof ayaa ku dhimatay,
108 kalana wey ku dhaawacmeen labo weerar oo kale oo isla maalintaasi habeenkeeda
ka dhacay magaalada Beledweyne.
Ra’iisul Wasaaraha oo shalay la kulmay madaxda hay'addaha amniga dalka iyo kuwa howlgalka Midowga Afrika ee AMISOM,
ayaa magacaabay guddi isku dhaf ah oo isugu jira wasiirro iyo saraakiil amni oo
dowladda iyo AMISOM ka wada tirsan, kuwaasoo looga fadhiyo in ay si deg-deg ah
uga soo tala bixiyaan weerarradii dhawaan ka dhacay magaallooyinka Baledweyne
iyo Muqdisho.
Hassan Istiila, Hiiraan Online
[email protected]
