Axad, Luulyo, 24, 2022 (HOL) - Wiil dhalinyaro ah ayaa geeriyooday, gabadh kalena dhaawac ayaa soo gaadhay kadib markii gabadha dhaawacantay saygeedu uu xabad ku furay wiilka iyo gabadha oo wada socda xaafada Shiraacle ee Hargaysa, abaaro 1:25AM, habeenkii Sabtida.
Goob-jooge ayaa CBA TV u sheegay in wiilka dhintay oo lagu magacaabi jiray Cawaale Xasan Nuur Bilaal la dilay, kadib markii uu xili habeenimo ah isku dayay in uu sii dhaweeyo gabadh wadada maraysay, isagoo sii hoyanaya.
"1:25 AM ayaan aniga oo tuukaanka kusii socda wadada wayn isku aragnay, waxan ku idhi Caawalow, waligay adoo wado taagan kuma arage maxa ku helay, wuxuu yidhi qaadkii ayaa ila habsaamo waan hurdo doonanayaa, oo gabadhaasan sii kaxaynayaa, 3 mirir kadibna inantii oo dhawac ah ayaa la ii keenay ... kadibna inankii oo dhawac ah, dadkii dhakhtarka geeyay ayaan kamid ah, dadku ku ag go'ay ayaan kamid ahaa".
Goob-jooge kale ayaa CBA TV u sheegay in gabadha saygeedu uu xabad ku furay wiilka iyo gabadha sidaana uu wiilku ku geeriyooday "Gacan ka xaqdaran ayaa dishay oo gabadha ninkeedii ayaa toogtay, ninkani inanyaro daacad ah ayuu ahaa, wuu sii dhawaynayay".
Ciidamada Booliiska Somaliland ayaa ku guulaystay in ay gacanta ku soo dhigaan eedaysanaha, isaga oo baxsad ah oo ku sugan deegaanka Bali Cigaal oo ka baxsan magaalada Hargaysa.
Faah faahin lagama helin wali sababta keentay in eedaysanuhu uu xabada ku furo wiilka iyo gabadha, lakiin waxa loo malaynayaa in uu ka maseeray wiilka xaaskiisa la socda.
Abdilahi Geel-maal, Hiiraan Online
[email protected]