Sabti, Febraayo, 19, 2022 (HOL) - Ugu yaraan hal qof oo shacab ah ayaa ku geeriyooday, toban kalena dhaawacyo ayaa kasoo gaaray qarax galabta ka dhacay magaalada Boosaaso.
Qaraxa oo ahaa Miino lasii diyaariyay ayaa ka dhacay goob ay dad shacab ah ku qaxweynayeen, waxaana dadka dhaawacmay ku jira nabadoono iyo dad kale oo shalay ka qeyb galay kulan lagusoo dhoweynayay xildhibaan Jamaal Maxamed Xasan.
Qaar kamid ah dhaawacyada ayaa xaaladdooda caafimaad laga deyrinayaa, iyadoo ay suurtagal tahay in khasaraha dhimashadu uu intaas kasii bato.
Lama oga cidda falkaan ka dambeysa, waana qaraxii afaraad oo muddo bil iyo bar gudaheed ka dhaca magaalada Boosaaso.
Alshabaab ayaa sheegatay masuuliyadda qaraxyadii hore. Lama oga in ay qaraxaan iyagu ka dambeeyaan.
Qaraxan ayaa kusoo aadaya, iyadoo magaalada Bosaso ay ka socoto qaban qaabada doorashada xildhibaannada aqalka hoose.
Madaxweyne Deni ayaa halkaas ku wajahan maalinta berito ah, waana socdaalkii ugu horreeyay ee uu ku tagayo Bosaso tan iyo markii rabshaduhu ka dhaceen.