Hey’adda NISA iyo AMISOM oo khilaaf dhanka amniga ah uu soo kala dhexgalay
Talaado, April, 5, 2022 (HOL) - Warar lagu
kalsoonyahay ayaa sheegaya in Hey’adda Nabadsugidda Qaranka (NISA) iyo ciidamada nabad
ilaalinta AMISOM uu soo kala dhexgalay khilaaf ku saleysan arrimaha amniga
xeyndaabka Xalane iyo Ayraboorka.
Khilaafkan wuxuu salka ku hayaa kadib markii ay AMISOM ku wargalisay ciidamo ka tirsan Nabadsugida NISA oo laba bar kantarool ku dhex leh xerada Xalane inay ka guuraan, sababo lagu sheegay walaac la xiriira dhanka amniga.
Warka ay HOL heshay wuxuu intaas ku darayaa in ciidamada NISA
ay ka horyimadeen dalabka AMISOM midaas oo keentay ismariwaa illaa iyo haatan
ka dhextaagan labada dhinac. Waxaan la ogeyn in dalabka AMISOM iyo walaaca amni
uu yimid kadib weerarkii 23-dii bishii hore ee March ay laba dabley oo ka tirsan
kooxda Al-Shabaab ay ku qaadeen saldhig si adag loo ilaaliyo oo ay ciidamada
AMISOM ku leeyihiin qeybo ka mid ah Xalane oo ah meel aad ugu dhow ayraboorka Muqdisho ee Adan Adde International
Airport.
Khilaafkan cusub ee soo kala dhexgalay labada dhinac ayaa ku
soo beegmaya kadib fariintii ugu dambeysay ee hey’adda NISA soo dhigtay boggeeda
Twitter-ka midaas oo ay ku sheegeen inay jiraan iskudayo ay kooxda Al-Shabaab
qorsheynayaan inay ku beegsadaan Madaxweyne Farmaajo iyo ra'isulwasaare Rooble.
Fariinta qoraalka la soo dhigay bogga Twitter-ka
NISA, waxaa ka horeeyay hadal uu hore u jeediyay isbuucii la soo dhaafay
ra’isulwasaare Rooble taas oo uu ku sheegay in loo soo diray fariimo hanjabaad
ah.
Arrimahan ayaa ku soo beegmaya xilli siyaasadda
Soomaaliya iyo arrimaha doorashooyinka ay marayaan meel xasaasi ah.
Hiiraan online news desk
