9/26/2021
Today from Hiiraan Online:  _
Wararka Maanta- Axad, July 18, 2021
Dowladda Soomaaliya oo ka hortimid warbixin ay soo saareen koox katirsan midowga Afrika
 

Axad, Luulyo, 18, 2021 (HOL) - Dowladda Somaaliya ayaa gaashaanka u daruurtay warbixinta kasoo  baxday Guddiga Qiimaynta Madaxa Bannaan ee Midowga Afrika, taasoo looga hadlay arrimo ku saabsan howlgalka AMISOM iyo xaaladda Soomaaliya.

Dowladda Soomaaliya waxay qabatay kulan wasiiro ah oo looga hadlayo warbixinta waxayna diiday bilowgaba talooyinka warbixinta, iyadoo soo saari doonta war rasmi ah oo loogasoo horjeedo arrintan.

Warbixintan oo ka kooban 35 bog, ayaa sharraxaysa xaaladda amniga ee Soomaaliya iyo arrimo ay sheegeen in ay ogaadeen xilligii ay qiimaynta wadeen. Inkastoo midowga afrika aanu si rasmi ah u soo saarin warbixintan.

Waxyaabaha lagu sheegay waxaa ka mid ah in wixii ka dambeeya 2021 howlgalka Amisom lagu wareejiyo Midowga Afrika iyo Qaramada Midoobay oo wadajir ah iyo  in Soomaaliya la geeyo ciidamada Bariga Afrika.

Dowladda Soomaaliya ma ay sheegin sababta ay warbixintaasi ku diiday, inkastoo warbixinta lagu sheegay waxyaabo dowladdu dhibsatay oo ay kamid yihiin, sida in aanay jirin  dhismeyaal maamul oo ay dowladda leedahay, maxkamado iyo saldhigyo boolis, xarumo caafimaad, kuwo wax barasho.

Waxaa warbixintan lagusoo beegay iyadoo dowladda federalka Soomaaliya ay ku mashquulsan tahay qaban qaabada doorashooyinka dib u dhaca uu ku yimid ee dhawaan heshiiska laga gaaray.

Abdiweli M. Sheikh, Hiiraan Online
 












Click here
7/18/2021 1:58 PM EST
Axad, Luulyo, 18, 2021 (HOL) - Xarunta xuquuqal insaanka madaxa bannaan ee Somaliland, ayaa xukuumada Somaliland ugu baaqday in ay siidayso 42 qof, oo magaalada Boorama loogu xidhay in ay qaateen calanka Soomaaliya 26 Juun.

7/18/2021 9:37 AM EST
Axad, Luulyo, 18, 2021 (HOL) - Wasiirka Shaqada iyo Arrimaha Bulshada Xukuumadda Federaalka Soomaaliya, Mudane Cabdiwahaab Ugaas Xuseen Ugaas Khaliif oo ah xildhibaan ka tirsan Baarlamaanka Federaalka ayaa mar kale sheegay inuu u sharraxanyahay kursigaa ka tirsan Golaha Shacabka, ka dib munaasabad ka dhacday hoygiisa degmada Ceel-Barde.

7/18/2021 8:22 AM EST
Axad, Luulyo, 18, 2021 (HOL) - Madaxweyne ku xigeenka Jubbaland, Maxamuud Sayid Aadan, ayaa magaalada Kismaayo kusoo dhoweeyay guddiga xalinta khilafaadka arrimaha gobolka Gedo oo soo gabagabeeyay safarkoodii Garbahaareey.

7/18/2021 4:39 AM EST
Axad, Luulyo, 18, 2021 (HOL) - Guddoomiyaha xisbiga UCID Faysal Cali Waraabe, oo waraysi siiyay BBC, ayaa sheegay in xildhibaanada UCID ee Kulmiye la heshiiyay ay sharci jabin sameeyeen.

7/18/2021 4:29 AM EST
Axad, Luulyo, 18, 2021 (HOL) - Guddigii uu Ra'isul Wasaaraha Soomaaliya, Maxamed Xuseen Rooble u xilsaaray arrimaha gobolka Gedo, si doorashada xubnaha labada aqal uga dhacdo Garbahaareey ayaa ku guulaystay in heshiis laga gaaro doorashada Garbahaareey.

7/18/2021 3:52 AM EST
Axad, Luulyo, 18, 2021 (HOL) - Xukuumada Somaliland, ayaa xayiraadi ka qaaday diyaarada Air Arabia sida lagu baahiyay boga facebook ee SNLTV.

7/18/2021 2:46 AM EST
Axad, Luulyo, 18, 2021 (HOL) - Guddoomiyaha Guddiga Hirgelinta Doorashooyinka heer Fedaraal Maxamed Xasan Cirro ayaa Xalay kulan la qaatay guddiga amniga doorashooyinka dalka ee heer qaran ee uu guddoomiye u yahay taliyaha ciidamada Booliiska Soomaaliya Jenaraal Cabdi Xasan Xijaar.

7/18/2021 1:33 AM EST
Axad, Luulyo, 18, 2021 (HOL) - Meydka laba wiil oo Walaalo ahaa oo ku dhacay Wabiga Shabeelle ee dhexmara gudaha magaalada Baledweyne ayaa laga helay xaafada Buundaweyn ee magaalada Baledweyne.

7/18/2021 1:24 AM EST
Axad, Luulyo, 18, 2021 (HOL) - Warar dheeraad ah ayaa kasoo baxaya dil Xalay loogu geystay magaalada Baledweyne Askari ka tirsana ciidamada dowladda Soomaaliya.