Sabti, September, 4, 2021 (HOL) - Guddoomiyaha Golaha Guurtidda Somaliland Saleebaan Maxamuud Aadan, ayaa wax lala yaabo ku tilmaamay in xisbiyada mucaaradka Somaliland, ay ku wada guulaystaan dhamaan saddexda xubnood ee shirguddoonka golaha wakiilada.
Guddoomiyaha ayaa ku andacooday in anay adduunka ka dhicin, in xisbiyada mucaaradku ku wada guulaystaan dhamaan xubnaha shirguddoonka golaha wakiilada, isla markaana xisbiga talada haya aanu waxba ka helin.
"Mudadii aynu kala maqnayn waxa soo kordhay doorashadii shirguddoonka golaha wakiilada ee saddexda ahaa, saddexdiiba mucaaradka ayaa isku teeday, tiro ayay isku biirsadeen qoladii mucaaradka ahaydo wixiiba iyaga wada qaatay, adduunka sidaa maaha" ayuu yidhi guddoomiyuhu.
"Xisbigii muxaafadka ahaa oo aan laga wada badnayn haday qolo mid dheeratay, qolada kale aad uga yartahay in la yidhaa mucaaradkiina wax buu helay xisbul xaakin kiina waxba ma helin, adduunka kama dhacdo, lakiin sidooda ayaynu ugu daynaynaa" ayuu hadalkiisa ku daray guddoomiyuhu
Guddoomiye Saleebaan ayaa ka mid ahaa garsoorkii maamulayay doorashadii shirguddoonka golaha wakiilada, ee xisbiyada mucaaradku guusha kasoo hooyeen, isagoo lagu amanay doorkii uu ka qaatay in doorashadu si hufan u dhacdo.
Abdilahi Abdirahman Mahamed, Hiiraan Online
[email protected]