9/21/2021
Today from Hiiraan Online:  _
Wararka Maanta- Axad, Jun 27, 2021
Wasaaradda amniga Galmudug oo war kasoo saartay weerarkii Alshabaab kusoo qaadeen Wisil
 

Axad, Juun, 27, 2021 (HOL) - Wasaaradda amniga Galmudug ayaa war qoraal kasoo saartay weerar kooxda Alshabaab saakay aroornimadii hore kusoo qaadeen fariisin ciidamada Galmudug ay ku lahaayeen magaalada Wisil oo dhacda 60km dhanka Woqooyi ee magaalada Hobyo.

Wasaaradda amniga waxay sheegtay qorshaha Alshabaab inuu ahaa in ay la wareegaan Magaalada istiraatiijiga ah ee Wisil, ayna laayaan ciidamadii halkaas ku sugnaa, sidoo kalena qabsadaan gaadiidka iyo hubka saldhigaas yaallay.

Wasaaraddu waxay sheegtay in ciidamada daraawiishta Galmudug oo kaashanaya dadka deegaanka ay iska caabiyeen weerarkaas, waxayna sheegtay in ay khasaaro xooggan gaarsiiyeen kooxda Shabaab ee soo weerartay.

Qoraalka waxaa lagu sheegay in weerarkaas Shabaab looga dilay kontomeeyo islamarkaana Galmudug ay u dirtay gurmad ciidamo laga soo kala diray magaalooyinka Gaalkacyo, Dhusamareeb, Hobyo iyo deegaamo kale.

Galmudug waxay ugu dambayn tacsi u dirtay ehelada dadkii ku geeriyooday weerarka Wisil ee isugu jiray ciidamo iyo shacab, mana sheegin tirada rasmiga ah ee khasaaraha soo gaaray ciidamada Galmudug iyo dadka shacabka ah.

kooxda Alshabaab ayaa sheegatay in ay 52 askari ku dileen weerarka ay kusoo qaadeen Wisil. Bishii Ramadaan ayay ahayd markii Alshabab ay si nabad galyo ah kula wareegeen degmada Bacaadweyne ee gobolka Mudug.

Abdiweli M. Sheikh, Hiiraan Online
 












Click here
6/27/2021 12:45 PM EST
Axad, Juun, 27, 2021 (HOL) - Warbixin ay soo saartay maxkamada sare ee Somaliland, ayaa lagu sheegay in Maxkamadu ay maanta dhagaysatay dacwadaha 7 musharax.

6/27/2021 11:39 AM EST
Axad, Juun, 27, 2021 (HOL) - Wasiirka warfaafinta Somaliland Saleeban Yusuf Cali Koore, ayaa wax laga xumaado ku tilmamay hadalkii madaxweyne Farmaajo ee aha "Somaliland kacdoon midnimad doon baa ka socda".

6/27/2021 11:02 AM EST
Axad, Juun, 27, 2021 (HOL) - Guddoomiyaha xisbiga UCID Faysal Cali Waraabe, ayaa sheegay in madaxweyne Biixi, uu dagaal sharci daro ah ka dhex wado golaha wakiilada.

6/27/2021 6:49 AM EST
Axad, Juun, 27, 2021 (HOL) - Wararka ka imaanaya dalka Kenya ayaa sheegaya in lasoo qabtay labo ruux ku eedeysan iney ka dambeeyeen afduub iyo jirdil bishaan biloowgeedi loo geystay gabar Soomaaliyeed oo lagu magacaabo Xafsa Maxamed Luqmaan.

6/27/2021 6:30 AM EST
Axad, Juun, 27, 2021 (HOL) - Taliyaha ciiddanka booliiska gobolka Mudug gaashaanle sare Muumin Cabdi Shire ayaa farriin culus u diray ururka Alshabaab, kadib markii maanta magaalada Gaalkacyo lagu toogtay 18 nin oo ay Puntland ku sheegtay in ay ahaayeen shabakad Shabaab katirsan oo dilal iyo qoraxyo ka geystay Puntland.

6/27/2021 5:09 AM EST
Axad, Juun, 27, 2021 (HOL) - Dagaalamayaasha Al-shabaab ayaa guulo waa weyn ka sheegtay dagaal culus oo qarax Ismiidaamin ahaa ku bilaawday oo aay saaka waabarigii hore ku qaadeen Saldhiga deegaanka Wisil ee gobolka Mudug.

6/27/2021 1:57 AM EST
Axad, Juun, 27, 2021 (HOL) - Maxkamadda ciidamada qalabka sidda ee Puntland ayaa saaka waaberigii xukun dil toogasho ah ku fulisay 18 nin oo katirsan Alshabaab, kuwaas oo dhawaan lagu riday xulin dil ah.

6/27/2021 1:54 AM EST
Axad, Juun, 27, 2021 (HOL) - Wararka naga soo gaaraya deegaanka Wisil ee gobolka Mudug ayaa sheegaya in halkaasi aroornimadii hore ee saakay uu ka dhacay dagaal xoogan oo u dhaxeeyay ciidanka Daraawiishta maamulka Galmudug iyo Al-shabaab.

6/27/2021 1:42 AM EST
Axad, Juun, 27, 2021 (HOL) - Maamulka Hirshabeelle ayaa ku dhawaaqay inaysan qeyb ka heyn shirka lagu wado inuu maanta Muqdisho uga furmo golaha wadatashiga qaranka, kaasoo uu iclaamiyay Raysal wasaaraha Xukuumadda Soomaaliya.

6/27/2021 1:33 AM EST
Axad, Juun, 27, 2021 (HOL) - Ciidanka booliska Somaliland ee gobolka Awdal ayaa xabsiga dhigay 50 dhalinyaro ah, oo laso baxay calanka Soomaaliya munasibada 26 Juun sida boolisku sheegay.