1/25/2021
Today from Hiiraan Online:  _
Wararka Maanta- Talaado, Nov 3 , 2020
Halkee ayuu ku danbeeyay Khilaafkii awood-qeybsiga doorasho ee Dowlad Gobolleedka Hirshabeelle


 

Talaado, November, 03, 2020 (HOL)- Waxaa maanta ku dhawaaqay is casilaadiisa madaxweynihii Dowlad Gobolleedka Hirshabeelle Maxamed Cabdi Waare  isaga oo qoraal dheer uu soo saaray ku sheegay in shaley iyo maantaba aan  loo marin dhismaha maamulkii uu madaxweynaha ka soo ahaa dariiqii saxda ahaa.

Gaar ahaan marka la eego habka awoodqeybsiga bulshada ku dhaqan labada Gobol Hiiraan iyo Shabeellaha Dhexe oo uu  Waare sheegay in aan lagu sameyn qiimeyn dhab ah waxaana halkaa ka dhashay sida uu hadalka u dhigay maamul aan isku miisaaneyn oo dad badanni dood ka qabaan.

''Labada marba dhismaha maamulkan waxaa lagu soo aadiyay xili uu dalku gallayo marxalad doorasho, taasoo keentay in mar walba lagu dhiso danno siyaasaddeed oo laga leeyahay doorashada guud ee dalka'' ayuu yiri Waare.

Hadalka Waare iyo is casilaadiisa ayaa imanaya xili maalin uun ka hor madaxweynihii hore ee Soomaaliya Shariif Sheekh Axmed uu  safar ku taggay magaalada Jowhar waxaana socdaalka Shariif-ka  ka dhashay su'aalo dhowr ah oo ku gadaaman Doorashada Hirshabeelle.

Dad badan ayaa qaba in Shariif Axmed uu  Jowhar  u taggay ugu yaraan in uu  is badal ku sameeyo nidaamka Doorashada si ka duwan sida ay dooneyso madaxtooyada Villa  Soomaaliya, balse wax war ah kama soo bixin kulamadii uu la qaatay Duubabka dhaqanka iyo  madaxweyne ku-xigeenka Hirshabeelle Cali Cabdullaahi Xusseen Cali Guudlaawe oo la leeyahay waa shaqsiga Villa Soomaaliya ay la dooneyso in uu noqdo madaxweynaha Hirshabeelle ee xiliggan.

Waare ayaa dhiniciisa wax lala yaabo ku tilmaamay in hoggaanka Mucaaradka oo intooda badan ka soo jeeda sida uu hadalka u dhiggay Hirshabeelle sheeda kore ka daawanayaa xaalada murugsan  ee maamulkan wajahayo, iyaga oo taa badalkeeda qoraalo is daba- joog ah ka  soo saaraya ayuu yiri  xaalado  siyaasadeed oo ka jira deegaanno kale. 

Maamulkan Hirshabeelle  oo la yagleelay sanadkii 2016kii oo uu dalka madaxweyne ka ahaa Xassan Sheekh Maxamuud  waxaa lagu dhisay is afgarad iyo heshiis leys kula meel dhiggay dhinaca awood-qeybsiga gaar ahaan Kursiga madaxweynaha, ku-xigeenkiisa iyo xarunta Dowlad Gobolleedka oo ay u codeeyeen Xildhibaannada Baarlamaankii kan ka horeeyay.

Heshiiskan oo markii danbe lagu shaaciyay qoraal ka soo baxay Urur Gobolleedka IGAD ayaa leysku afgartay waqtigaas in Kursiga madaxweynaha loo daayo Gobolka Hiiraan, halka madaxweyne ku-xigeenka iyo xarunta Dowlad Gobolleedka-na loo asteeyay gobolka Shabeellaha Dhexe,

Balse Siyaasiyiin iyo Waxgarad ka soo jeeda Gobolka Hiiraan ayaa ku eedeynaya madaxtooyada Soomaaliya in ay waddo qorshe ka dhan ah heshiiskaa hore kaasoo  Kursiga Madaxweynaha ka dhiggaya mid furan oo aan u xirneyn Gobol iyo Qolo gaar ah toona, waxaana ay siyaasiyiintaasi ka diggeen haddii ay taa dhacdo  burbur ku iman kara jiritaanka Hirshabeelle.

Madaxtooyada Soomaaliya iyadu wax war kama aysan soo saarin khilaafka siyaasadeed ee ka taaggan Hirshabeelle iyo waxa ka jira eedeymaha loo jeedinayo ee ah in ay badashay dhamaanba heshiisyadii hore ee lagu soo dhisay Hirshabeelle.

Ma jiro ilaa iyo hadda heshiis muuqda oo laga gaaray habka ay u dhaceyso doorashada Kursiga ugu sarreeya maamulkan ee (Madaxweynaha) oo la soo bandhiggay laakiin dadka siyaasadda u dhuun-daloola ayaa qaba in ay jiraan arrimo hoose oo socda lagana yaabo in marka la gaaro saacadaha ugu danbeeya ee doorashada wax walba is badalli karaan.

Cabdiraxmaan Diini, Hiiraan Online
[email protected]
   














Click here
11/3/2020 5:00 PM EST
Talaado, November, 03, 2020 (HOL) - Laamaha amniga Puntland ayaa magaalada Bosaso kusoo bandhigay labo nin oo dhalinyaro oo qirtay inay ka dambeeyeen kufsi iyo dil loo geystay Naciimo Cabdi Maxamed oo ahayd gabadh yar oo dhawaan maydkeeda laga helay Bosaso.

11/3/2020 10:11 AM EST
Talaado, November, 03, 2020 (HOL)-Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa warqadaha aqoonsiga ka guddoomay Danjireyaasha cusub ee dalalka Denmark, Ireland, Poland ee Soomaaliya.

11/3/2020 8:20 AM EST
Talaado, November, 03, 2020 (HOL) - Wasiirka Shaqada iyo Arrimaha Bulshada Xukuumadda Federaalka Soomaaliya, Mudane Duraan Axmed Faarax ayaa sheegay inuu diiradda saarayo sidii guul looga gaari lahaa hayaanka dhimista saboolnimada iyo koritaan loo siman yahay.

11/3/2020 6:23 AM EST
Talaado, November, 03, 2020 (HOL) - Ergeyga Qaramada Midoobay ee Soomaaliya James Swan, ayaa kulan la qaatay wasiirka arrimaha dibada Kenya Amb. Raychelle Omamo.

11/3/2020 5:39 AM EST
Talaado, November, 03, 2020 (HOL)- Shirkan oo uu Guddoominayo Ra'iisal Wasaare Maxamed Xusseen Rooble ayaa ayaa ka soconaya Hotel ku yaala gudaha Garoonka Diyaaradaha Aadan Cadde, waxaana diirrada lagu saaraya qodobo ay ka mid yihiin Arrimaha Doorashooinka dalka, Amniga, Kobcinta Dhaqaalaha, Daynta cafinta, horumarinta bulshada,Caddaaladda iyo qorshaha waxqabadka xukuumadda ee 100- a maalmood.

11/3/2020 1:01 AM EST
Talaado, November, 03, 2020 (HOL) - Ganacsatada kalluunka qalalan ee gobolka Lamu ee dalka Kenya, ayaa codsaday in dib loo furo xadka Lamu iyo Soomaaliya si ay awood ugu helaan in ganacsigoodu u gudbo Soomaaliya.

11/3/2020 12:54 AM EST
Talaado, November, 03, 2020 (HOL) - Ciidamada amniga Puntland ayaa dhaqdhaaqyo ciidan ka bilaabay degaanada gobolka Sanaag kadib markii Al-shabaab qabsadeen dhowr tuulo oo hoos yimaada gobolkaas.

11/3/2020 12:39 AM EST
Talaado, November, 03, 2020 (HOL)-Xildhibaannada Baarlamaanka Labaad ee Dowlad Gobolleedka Hirshabeelle ayaa maanta lagu waddaa in ay khudbado ka dhageystaan musharixiinta u taaggan qabashada xilka Guddoonka Baarlamaanka.

11/3/2020 12:26 AM EST
Talaado, November, 03, 2020 (HOL) -Madaxweynihii Dowlad Gobolleedka Hirshabeelle Maxamed Cabdi Waare ayaa bartiisa Twitter -ka ku shaaciyay in uu iska casilay xilkii madaxweynaha, isaga oo sheegay in uu u maray qaab sharciga waafaqsan.