5/28/2020
Today from Hiiraan Online:  _
Wararka Maanta- Jimco, May 22, 2020
NUSOJ oo dacwad u gudbisay maxkamada si cadaalada loo horkeeno kuwii dilay suxufiyiinta



Jimco, May 22, 2020 (HOL) - Maxkamadda gobolka Benaadir ayaa qabatay dacwad uusoo gudbiyay Ururka Qaranka Suxufiyiinta Soomaaliyeed ee NUSOJ oo ka codsaday in maxkamaddu ay farto Xafiiska Xeer Ilaaliyaha Guud ee Qaranka in uu baaris ku sameeyo dilalka loo geystay in ka badan 50 suxufi oo Soomaaliya lagu dilay.

Dacwadan oo la gudbiyay maalintii arbacada aheyd oo ay taariikhda ku beegneyd 20-ka May 2020 ayaa waxaa lagu sheegay in wariyaasha Soomaaliya lagu dilay dhowr iyo tobankii sano ee lasoo dhaafay aysan badan kood helin wax cadaalad ah, ayna sababtay sii socoshada dilalka qorsheysan ee ka dhanka ah suxufiyiinta.

Xoghayaha Guud ee NUSOJ Cumar Faaruuq Cusmaan ayaa sheegay in Soomaaliya aysan wax ka qaban karin caburinta lagu hayo suxufiyiinta iyo saxaafadda xorta ah haddii aysan baaris dhab ah oo deg deg ah ku sameyn kuwa geystay dilalka naxariis darada ah ee suxufiyiinta oo aan isla markaana cadaaladda la horkeenin.

“Hadafkeenu waa in Maxkamadda iyo Xafiiska Xeer Ilaaliyaha Guud ee Qaranka ay maxkamadeeyaan oo ay ciqaabta ay mudan yihiin marsiiyaan ku soo abaabulay iyo kuwii ka dambeeyay dilalka loo geysto suxufiyiinta” ayuu yiri Cumar Faaruuq Cusmaan.

Codsigeeda ayay NUSOJ ku sheegtay in dilalka suxufiyiinta aysan ahayn oo keliya xadgudub ka dhan ah sharciga caalamiga ah ee xuquuqda aadanaha laakiin uu sidoo kale yahay xadgudub soo noq-noqday oo loo geystay dastuurka KMG ah ee Soomaaliya, gaar ahaan qodobkiisa 13aad ee damaanad qaadaya xaqa uu qofku u leeyahay in uu noolaado iyo qodobka 18aad ee xorriyadda hadalka iyo ra'yiga.

Cumar Faaruuq waxaa uu intaas ku daray in jawaab deg deg ah oo kasoo baxdo garsoorka dalka ayadoo la baarayo lana marsiinayo cadaaladda ay mudan yihiin kuwa lagu tuhmayo in ay geysteen dilalka suxufiyiinta ay muhiim u tahay xaqiijinta kalsoonida shacabku ay ku qabaan garsoorka iyo in ay shacabka u hogaan samaan sareynta sharciga.

NUSOJ waxay sheegtay in dadka Soomaaliyeed ay xaq u leeyihiin in aan laga dafirin inay ogaadaan runta waxa dhacay, iyo sidoo kale sababihii iyo duruufahii ay ku dhaceen dambiyada gaboodfalka ah ee aan la ciqaabin sida dilalka suxufiyiinta.

Hiiraan Online News Desk









Click here
5/22/2020 7:55 PM EST
Jimco, May 22, 2020 (HOL) - Madaxweynaha dowlad goboleedka Puntland, Siciid Cabdulaahi Deni ayaa caawo shaqada ka eryay wasiirro iyo ku xigeeno katirsanaa golihiisa wasiiradda, isagoo kuwa kale ku bedelay.

5/22/2020 7:45 PM EST
Jimco, May 22, 2020 (HOL) - Dowladda Soomaaliya ayaa goor dambe oo caawo ah shaacisay inay berito tahay maalinta koowaad ee bisha Shawwaal iyo ciidul Fidri, iyada oo burisay go'aan horey ugasoo baxay caawo fiidkii oo lagu sheegayay in ay beri Soon tahay.

5/22/2020 7:37 AM EST
Jimco, May 22, 2020 (HOL) - Wakiilka Midowga Afrika ee Soomaaliya Francisco Madeira oo qudbad ka jeediyay kulankii golaha ammaanka ee Qaramada Midoobay ee looga hadlayay arrimaha Soomaaliya ayaa ka hadlay xaaladaha siyaasadeed ee Jubbaland iyo heshiis ay gaareen hogaanka Jubbaland iyo xubno kamid ah garabyada Mucaaradka Jubbaland.

5/22/2020 7:23 AM EST
Jimco, May 22, 2020 (HOL) - Maamulka Suldada Falastiin ayaa si cad u diiday gar-gaar loogu tala-galay ka hortagga Coronavirus oo ay Imaaraadka usoo mariyeen Isra’el Khamiistii shalay, maamulkaas ayaa sheegay in loo baahnaa in deeqdaasi si toos ah loogu soo hagaajiyo madaxda Falastiin, iyadoo aan lasoo marsiin dhinaca Yuhuudda.

5/22/2020 6:42 AM EST
Jimco, May 22, 2020 (HOL) - Dowladda Maraykanka ayaa ugu baaqday madaxweyne Farmaajo inuu sida ugu dhaqsaha badan uguna macquulsan u qabto kulanka Golaha Amniga Qaranka, si looga wada hadlo qorsheynta doorashada soo socota, iskaashiga amniga, iyo waxyaabaha kale ee mudnaanta leh ee qaranka.

5/22/2020 6:15 AM EST
Jimco, May 22, 2020 (HOL) - Madaxweyne Donald J. Trump ayaa mar kale sheegay hadallo adag oo xanaf leh oo ay dhibsan doonaan dalal badan oo uu kamid yahay Ruushka, kadib markii uu qeexay in waddankiisa uu ka bixi doono heshiis horay loo galay oo dhigayay in diyaaradaha aan hubeysneyn ay si xor ah ku gooshi karaan hawada dhinacyada heshiinkaan saxiixay.

5/22/2020 6:02 AM EST
Jimco, May 22, 2020 (HOL) - Wararka ka immaanaya gobolka Gedo ee koonfurta Soomaaliya ayaa waxay sheegayaan in xalay dagaal qaatay muddo ku dhowaad saacad ah uu dhex-maray ciidamada dowladda ee halkaasi jooga iyo Al-shabaab.

5/22/2020 5:28 AM EST
Jimco, May 22, 2020 (HOL) - Golaha ammaanka ee Qaramada midoobe ayaa ka hadlay xaaladda Soomaaliya , iyagoo warbixin ka dhageystay ergayga gaarka ah ee Jimciyadda quruumaha ka dhexeysa u qaabilsan Soomaaliya James Swan iyo safiirka midowga Afrika ee Soomaaliya Danjire Francisco Madera, waxayna ka hadleen labadaba arrimihii ugu dembeeyay Soomaaliya , sida doorashooyinka iyo dagaalladii u dhexeeyay ciidamada dowladda iyo Al-shabaab, si gaar ah kii Jannaale.

5/22/2020 5:06 AM EST
Jimco, May 22, 2020 (HOL) - Waxaa dalka Soomaaliya lagusoo celiyay muwaadiniin Soomaaliyeed oo ku xayirnaa illaa iyo seddex waddan kuwaasi oo uu saameeyay socdaal joojinta uu sababay xanuunka Coronavirus ee caalamka.