Wasiirka Qorsheynta ‘’ Mashruucii biyo xireenka Fatahaadda wali waa halkiisii wax laga laabtay ma jiraan
Talaado, November, 19, 2019
(HOL)-Dowladda Soomaaliya ayaa waxba kama jiraan ku tilmaamtay warka ku saabsan
in dowladda Talyaaniga dib ula noqtay lacag dhan $ 6 Milyan oo dollar oo loogu
talagalay in biyo xareen loogu sameeyo magaalada Beledweyne.
Warbaahinta Talyaaniga ayaa lagu
daabacay in dowladda Talyaaniga ka laabatay mashruuc ay dooneysay in ay biyo
xireen uga sameyso deegaannada uu fatahaadda ka sameeyo Wabiga Shabeelle gaar
ahaan magaalada Beledweyne oo dhibaato ba’an ay ku heyso Fatahaadda.
Wasiirka Qorsheynta Dowladda
Soomaaliya Jamaal Maxamed Xassan ayaa sheegay in wali qorshihii mashruuca waxba
iska badalin dowladda Soomaaliyana gudbisay dhamaanba wax-yaabihii looga
baahnaa loo sii guda-galo heshiiska arintan ku saabsan balse waxaa uu sheegay
Wasiirka in uusan jirin ilaa iyo hadda heshiis dhacay.
Si la mid ah Wasiirka Qorsheynta
waxaa isna ka hadlay arintan Wasiirka Beeraha dowladda Soomaaliya Saciid
Xusseen Ciid oo sheegay in dowladda Soomaaliya gudbisay dhamaanba macluumaadkii
looga baahnaa, balse loo baahan yahay in labada dowladdood isla wada saxiixaan
fulinta mashruucan kaasoo wali ah qorshe dhiman oo aan la gaarin.
Warbaahinta ayaa sheegtay in
Talyaanigu dib uga laabtay mashruucan kaddib markii ay wax jawaab ah ka weyday
dowladda Soomaaliya loo soo bandhigay qorshahan sanadkii 2018ka oo magaalada
Beledweyne ay ku dhufatay Fatahaad sababtay khasaare nafeed iyo mid hantiyeed
intaba.
C/raxmaan Diini, Hiiraan Online
[email protected]
