Dowladda Soomaaliya oo ka hadashay in ay ka jawaabi weyday mashruuc biyo xireen loogu sameyn lahaa magaalada Beledweyne
Isniin, November, 18, 2019 (HOL)- Wasiirka
Beeraha dowladda Soomaaliya Saciid Xusseen Ciid oo la hadlay VOA ayaa beeniyay
in dowladda Soomaaliya ay gudbin weyday mashruuc la doonayay in biyo xireen
loogu sameeyo magaalada Beledweyne oo ay dalbatay dowladda Talyaaniga.
Wasiirka ayaa sheegay dhaqaalihii loogu
tala-galay biyo xireenka in aysan la noqon dowladda Talyaaniga halkiisiina uu
yahay Dowladda Soomaaliya –na gudbisay dhamaan wax-yaabihii laga dalbaday.
‘’Markii horeba is faham ayuu ahaa arinkan,
laakiin saxiix rasmi ah ma uusan jirin, Talyaanigu –na mabda’ahaan ayuu aqbalay
mashruucan ee marka la saxiixayo waa in labada dhinac isaga yimadaan oo sidaa
lagu saxiixaa mashruuca, waxey shardi ka dhiggeen in la keeno mashruucii oo dhameystiran cidda fulineysana la sheego, wax-yaabahaa ayeey sharuud ka dhiggeen,
Annagana waan u gudbinay mashruucii waa la dhameystiray dhawaanna waa la
saxiixayaa’’ ayuu yiri Wasiir Ciid.
Laakiin Shugri Saciid oo ah suxufi deggan dalka
Talyaaniga ayaa ku eedeysay dowladda Soomaaliya ay dhaafisay fursadan dadka reer
Beledweyne iyadoo qorshahan dowladda Talyaaniga ay soo bandhigtay sida ay hadalka u dhigtay sanadkii
2018kii oo ay Fatahaadii cusleyd ka dhacday magaalada Beledweyne.
‘’Mas’uuliyada la noqodka lacagta Dowladda
Soomaaliya baa wax ku leh, maxaa yeelay mashruucan wuxuu ahaa oo la soo
bandhigay 2018kii oo ay Fatahaada ku dhufatay magaalada Beledweyne ilaa waxaa la
sugayay bishii June ee sanadkan, intaa waxba lama soo gudbin’’ ayeey tiri
Shugri Saciid.
Balse Wasiir Ciid ayaa sheegay in mar walba hay’addaha
deeqaha bixiya iyagu u madax-bannaan-yihiin in waqtiggii ay doonaan dhaqaalahooda
bixiyaan, hasse ahaatee marnaba uusan jirin wax gaabis ah oo ka yimid dowladda
Soomaaliya ama xitaa dowalad gobolleedka Hirshabeelle.
Madaxweyaha dowlad gobolleedka Hirshabeelle
Maxamed Cabdi Waare oo laftirkiisa arintan wax laga weydiiyay ayaa VOA u
sheegay in mashruucan uusan baaqan wararka arintaan ku saabsanna yihiin kuwo
iska mala-awaal ah.
‘’Mashruucii hadda waa dhamaaday, wararka sheegaya
in lala noqday waa waxba kama jiraa iyo been abuur ‘’ ayuu yiri madaxweyne
Waare.
Fatahaadii ugu danbeysay ee ku dhufatay magaalada
Beledweyne ayaa sababtay dhimashada ku dhawaad 20 ruux, burbur hantiyeed iyo waliba in
dibadda magaalada ilaa iyo hadda ay ku daruufeysan yihiin kumannaan qoysas ah oo ka barakacay guryihiin ay ku noolaayeen.
Dadka ayaa marka aad la sheekeysato dalbanaya in mar uun maaro loo helo biyahan sanad walba ku soo fataha magaalada iyagoo arintaa ku tilmaamaya in ay u noqon laheyd gargaarkii ugu weynaa abid ee loo sameeyo.
C/raxmaan Diini, Hiiraan Online
[email protected]
