Shirka Shidaalka Soomaaliya oo maanta ka furmaya magaalada London
Khamiis, Feberaayo, 07, 2019
(HOL)- Maanta oo Khamiis ah taariikhdu tahay 07 bisha Feberaayo 2019ka ayaa
lagu wadaa in magaalada London uu ka furmo shirka looga hadlayo shidaalka
Soomaaliya, oo maalmihii ugu danbeeyay hadal heyntiisu ku badneyd baraha
bulshada iyo qeybaha kala duwan ee warbaahinta.
Magaalada London waxaa gaaray
oo ku sugan kana qeybgalaya shirka maanta furmaya Wasiirka Batroolka dowladda
Soomaaliya Cabdirashiid Maxamed Axmed, Agaasimaha Wasaarradda, iyo mas’uuliyiin
ka kala socda dowlad gobolleedyada dalka.
Shirkan oo muran badan uu ka
dhashay ayeey siyaasiyiinta mucaaradku sheegeen in uu yahay mid lagu xaraashayo
sida ay hadalka u dhigay kheyraadka Soomaaliya, hasse ahaatee waxaa arintaa
beenisay dowladda Soomaaliya.
Dowladda ayaa sheegtay in
shirka London uu yahay mid lagu soo bandhigayo macluumaadka sahmin shidaal oo
Soomaaliya laga sameeyay.
Wasiirka Batroolka Soomaaliya Cabdirashiid
Maxamed Axmed ayaa sheegay in sahankii la sameeyay uu muujinayo in Sooomaaliya
laga helay cadeymo muujinaya shidaal, shirka London na lagu soo bandhigi doono.
Dhanka kale shirkadda Spectrum oo ah shirkad qayb
ka ah shirka London ayaa sheegtay in shirka London lagu soo bandhigi doono
aagagga cusub ee ku soo kordhay sahminta shidaalka Soomaaliya.
Shirkadda ayaa sheegtay in shirka London uu yahay
mid ay wasaarada Betroolka iyo Macdanta ee Soomaaliya ay xarigga uga jari
doonto ayna qeexi doonto qeybihii ugu dambayay oo lagu wado inay ka koobnaadaan
50 xirmo oo ku fadhiya dhul dhan 173,000 km .
Laakiin dhinaca kale marka la eego dhaliisha ay
soo jeedinayaan siyaasiyiinta mucaaradka ayaa u muuqata mid shaki weyn
abuurtay, waxaana soo baxaya aragtiyo kala duwan oo qeybaha bulshadu ka qabaan
shirkan.
C/raxmaan Diini, Hiiraan Online
[email protected]
