Laascaanood oo markii ugu horaysey laga bilaabayo mashruuca horumarinta degmooyinka
Isniin, Feberaayo, 04, 2019 (HOL)- Kulan lagu qorshaynayo qaabka horumarineed ee degmada
Laascaanood ayaa lagu qabtay xarunta dawlada hoose ee Laascaanood xarunta
gobolka Sool.
Agaasimaha horumarinta gobolada iyo
degmooyinka wasaaradda arimaha Gudaha Maxamed Cali ayaa hawl-wadeenada dawlada
Hoose ugu bishaareeyey in mashruuca horumarinta degmooyinka iyo gobolada u
yihiin horbaxanyo oo ay qiimaynayaan baahiyuhu sida ay u kala horeeyaan.
"Mashruucii la odhan jirey JPLG
oo ka shaqayn jirey lix degmo ayaa haatan loo bedeley horumarinta degmooyinka iyo
gobolada kaas oo ay dawladu haatan maamusho ayaa magaalada Laascaanood ka mid
tahay, waana sababta aan halkii ugu horaysey ka dhiganay" sidaana waxaa
yidhi Maxamed Cali isagoo intaas ku daray in ay la socdaan Machadka tabarka
shaqaalaha oo iyana qiimaynaya aqoonta shaqaalaha.
Gudoomiyaha degmada Cabdicasiis
Xuseen ayaa ka warbixiyey faa'iidada mashruucan u leeyahay degmada, waxaanu
sheegay in qaadhaankii Machadka kaga soo aadey ay bixiyeen baahina ay u qabaan
kobcinta aqoonta shaqaalaha, waxaana uu degmooyinka kale ugu baaqay in ay
qaadhaanka bixiyaan.
Cabdiraxmaan Khadar Maxamuud
xoghayaha dawlada hoose ayaa isaguna halkaasi ku soo bandhigay baahiya dhabta
ah ee ka jira magaalada Laascaanood iyo qalabka ay haystaan.
Mashruucan oo in badan la sugayey ayaa
la saadaalinayaa in uu wax weyn ka bedelo muuqaalka iyo horumarka degmada
Laascaanood, waxaana uu ku soo beegmay xili ay xubno golaha degaanaka ka.mid ah
ay u xusul duubayaan sidii xilka looga tuuri lahaa maayirka hogaanka u ah oo
waxqabad la'aan ay calaamad uga dhigeen.
Seynab Cabdi Warsame
Laascaanood G. Sool