Madaxweyne ku-xigeenka Mareykanka oo digniin u diray Kim Jong-un
Talaado, May, 22,
2018 (HOL) – Madaxweyne ku xigeenka Maraykanka Mike Pence ayaa hogaamiyaha Kuuriyada
Waqooyi Kim Jong-un uga digay in uusan ciyaar la soo shir tagin haddii uu la
kulmo madaxweyne Donald Trump bisha soo socota.
"Waxay noqon doontaa khaladwayn haddii Kim
Jong-un ay la tahay in uu ku dheeldheeli karo Donald Trump," ayuu Pence ka
yiri telefeshinka Fox News oo uu waraysi siinayay.
Pence ayaa sidoo kale sheegay in laga yaabo in
Trump uu isaga baxo shirka loo ballansan yahay 12 Juunyo.
Kuuriyada Waqooyi ayaa ku goodiday in ay isaga
bixi doonto shirka kaddib hadal uu yiri John Bolton oo ah lataliyaha ammaanka
qaranka.
Dalkaas ayaa aad uga carooday hadalkii Bolton ee
ahaa "in la marin doono qaabkii" hubka looga dhigay Liibiya oo
kale".
Mucamar Al Qadaafi ayaa reer Galbeedka ka
ogolaaday in uu hubkiisa burburiyo 2003-dii isaga oo ku badashay in laga qaado
cunaqabataynta. Siddeed sano ka dibna waxaa dilay jabhado ay reer galbeedku
taageersanaayeen.
Madaxweynaha Kuuriyada Koonfureed Moon Jae-in
ayaa qorshaynaya in uu kula kulmo Trump Washington DC Talaadada si ay uga wada
hadlaan qorshaha shirka.
Pence ayaa sheegay "in aysan su'aal ka
taagnayn" in Trump uu doonayo in uu isaga haro kulanka lagu ballansan
yahay in uu Singapore ka dhaco.
"Uma malaynayo in madaxweyne Trump uu ka
fikirayo hagaajinta sawirkiisa, balse uu ka fikirayo nabbadda" ayuu yiri
madaxweyne ku xigeenku.
Wargayska New York Times ayaa Axaddii ku warramay
in madaxweynaha Maraykanku uu lataliyeyaashiisa iyo kaaliyeyaashiisa waydiinayo
in uu sii wado qorshaha uu uga qaybgalayo shirkaas iyo in kale.
Xigashada : BBC
