Dad rayid ah oo ku dhintay duqeyn ka dhacday dulleedka magaalada Kismaayo
Isniin, April, 02, 2018 (HOL)- Wararka ka imanaya deegaan lagu magacaabo
Kaamjiroon oo 25km dhinaca Galbeed uga beegan magaalada Kismaayo ayaa sheegaya
in duqeyn shalay halkaa ka dhacday ay ku dhinteen saddex ruux oo rayid ah halka
Afar ruux kalana ay ku dhaawacmeen dadkan oo dhamaantood ka soo jeeda hal Qoys.
Dadka dhaawacmay ayaa la sheegay in la geeyay
Isbitaalka Magaalada Ksimaayo, waxayna ay isugu jireen Hooyo, Laba caruur ah oo
ay dhashay iyo Nin da’ah.
Senator Iftiin Xasan Baasto oo ka tirsan Aqalka
sare ee Soomaaliya kana soo jeeda Jubbada hoose ayaa cambaareeyay duqeynta
isaga oo sheegay in uusan garaneynin sabab loo beegsaday dadka rayidka ah.
“Duqeynta waxay ka dhacday duleedka Magaalada
Kismaayo, dad shacab ah ayaa lagu laayay, sida aad aragteen dhaawacooda waxaa
la keenay Isbitaalka magaalada Kismaayo, duqeymaha dadka lagu leynayo way soo
bateen guddiga difaaca Baarlamaanka ayaan kala hadli doonaa, si uu u yimaado
isla xisaabtan” ayuu ku yiri wareysi uu siiyay VOA-da.
Diyaaradaha dagaalka ayaa Koonfurta iyo Bartamaha
Soomaaliya waxaa ay ku fuliyaan duqeymo ay la eegtan fariisamaha Al-shabaab ay
ku leeyihiin gobolada dalka, balse mararka qaar ayaa waxaa dhacda in howlgalkooda
ay khasaare ku gaarsiiyaan dadka shacabka ah
C/raxmaan Diini,
Hiiraan Online
[email protected]
