Ra’iisal wasaare Kheyre oo kala hadlay dhigiisa Itoobiya sii deynta maxaabiis Soomaaliyeed
Talaado, September, 05, 2017 (HOL) - Ra’iisal wasaaraha
Soomaaliya Xassan Cali Kheyre ayaa dhigiisa dalka Itoobiya Hailemariam Desalegn kala hadlay sidii
loo soo deyn lahaa maxaabiista Soomaaliyeed oo ku harsan xabsiyada dalkaasi.
Qoraal lagu baahiyay Wakaalada wararka Soomaaliyeed SONNA ayaa lagu sheegay in ra’iisal wasaaraha
Soomaaliya uu khadka talleefoonka kula hadlay ra’iisul wasaaraha Itoobiya.
Labada Mas’uul ayaa waxaa ay si weyn uga wada hadleen ahmiyadda ay leedahay
sidii ay xoriyadoodii dib ugu heli lahaayeen maxaabiista Soomaaliyeed ee wali
ku jira xabsiyada dalkaasi Itoobiya.
Hailemariam Desalegn
ayaa la sheegay in uu aqbalayd codsiga uga yimid dhinaca Dowladda
Federaalka Soomaaliya, isagoo muujiyay in dowladda Itoobiya ay diyaar u tahay
is-garab taaga dowladda iyo shacabka Soomaaliyeed.
Maxaabiistan labada dowladood ay isku afgarteen siideyntooda ayaa waxaa ku jira Wariye Maxamed
Aweys Muudey Boqorka Bartamaha oo shacabka Soomaaliyeed ay aad u garanayaan.
Arintan ayaa imaneysa xili dowladda Soomaaliya ay wajaheyso culuys
siyaasadeed oo uga imanaya ku wareejintii dowladda Itoobiya Cabdikariin Muuse
Qalbi-Dhagax oo la sheegay in uu ahaa sarkaal sare oo ka tirsan jabhada ONLF.
C/raxmaan Diini, Hiiraan Online
[email protected]
