Guddoome Taabit oo ka hadlay shaqo abuur loo sameynayo 1000 dhalinaro Soomaaliyeed ah
Talaado, September, 05, 2017 (HOL) – Guddoomiyaha maamulka
gobolka Banaadir Taabit Cabdi Maxamed oo maanta ka hadlayay munaasabad loo
qabtay Bandhiga shaqo abuurka dhalinyarada Soomaaliyeed ayaa ka hadlay habka
loo shaqaaleysiinayo 1000 dhalinyaro Soomaaliyeed ah.
Guddoomiyaha ayaa sheegay in maanta la daah furay sida uu hadalka
u dhigay dhawaaqii ra’iisal wasaaraha Soomaaliya Xassan Cali Kheyre oo horay u
balanqaaday in 1000 dhalinyaro Soomaliyeed ah la shaqaaleysiin doono.
‘’Maanta waxaan daah furnay Bandhig shaqo abuur loogu
sameynayo dhalinyarada Soomaaliyeed, waana balanqaadkii ra’iisal wasaaraha ee
ahaa in shaqo la siinayo 1000 dhalinyaro Soomaaliyeed ah, Bandhigan waxaa uu ahaa
mid aynu dadka sharaxaad ka siineyno barnaamjikan shaqo abuurka iyo waliba cida
maal-galineysa’’ ayuu yiri guddoomiyaha.
17 degmo ee Gobolka Banaadir ayaa degmo walbo waxaa la siiyay 58 qof marka
la isku daro tiro ahaan waxa ay gaartay 984 qof, 14 kasoo hartay waxaa loo
sameynayaa qorshooyin kale oo lagu shaqaaleysiinayo sida uu sheegay
guddoomiyaha gobolka Banaadir.
Qarashka ayaa waxa bixinaya bangiga adduunka, qofkiina
waxaa mushaar ahaan loo siin doonaa $150 doolar sida uu sheegay guddoomiyaha.
Dhalinayarada Soomaaliyeed ee ku dhaqan gudaha dalka
ayeey saameyn weyn ku yeelatay shaqo la’aanta wadanka jirta, iyadoo ay jiraan
waliba kumannaan dhalinyaro ah oo ka soo baxaya Jaamacadaha dalka gudihiisa ku
yaala.
C/raxmaan Diini, Hiiraan Online
[email protected]
