Waqtiga la qabanayo doorashada Kenya oo lagu dhawaaqay
Isniin, September, 04, 2017 (HOL) – Guddiga Doorashooyinka Kenya ee IEBC
ayaa ku dhawaaqay in 17-ka bisha Oktoobar la qaban doono doorashada
madaxweynenimo ee Kenya kadib markii ay maxkamad amartay in mar kale lagu celiyo
doorashada.
War ka soo baxay guddiga doorashada ayaa lagu sheegay in musharixiinta
kala ah Raila Odinga ee isbahaysiga NASA ee mucaaradka ah iyo Madaxweyne Uhuru
Kenyatta ee xisbiga Jubilee oo kaliya ay u tartami karaan doorashada, maadaama
labadoodu ahaayeen kuwii go’aanka maxkamadda lagu saleeyay.
Maxkamada sare ee dalka Kenaya ayaa Jimcihii aynu soo dhaafnay baabi’isay Doorashadii
dhacday 8-dii bishii Agoosto, taas oo guddiga shaaciyeen in uu ku guuleystay
Uhuru Kenyatta.
Go’aanka maxkamada ayaa waxaa ku gacan-seyray Uhuru Kenyatta oo laakiin
sheegay in uu ixtiraamayo maxkamada isaga oo sheegay in uu diyaar u yahay
doorashada ku celiska ah.
Raila Odinga ayaa markii uu soo baxay go’aanka maxkamada ku tilmaamay mid
taariikhi ah oo aan laga fileyn in ay gaarto maxkamad Africaan ah.
C/raxmaan Diini, Hiiraan Online
[email protected]
