Odayaal dhaqameed si adag u difaacay siyaasada dowladda federaalka
Axad, September, 03, 2017 (HOL) – Tan iyo wixii ka danbeeyay soo ifbixii warka
ku saabsan in dowladda federaalka Soomaaliya u gacan galisay dowladda Itoobiya
sarkaal sare oo la sheegay in uu ka tirsanaa Jabhada ONLF oo lagu magacaabo
Cabdikariin Muuse Qalbi –Dhagax, waxaa sii xoogeysanaya dhaleeceyn loo
jeedinayo dowladda federaalka Soomaaliya.
Gaar ahaan warbaahinta bulshada ay ku wada xiriirto [ Social Media ah ] ayaa
lagu arkayay qoraallo ay dadku wax isaga weydiinayaan sida ay u dhacday
arintan ku wareejinta dowladda Itoobiya
Qalbi –Dhagax iyo doorka ay dowladda federaalka ka qaadatay.
Laakiin odayaal dhaqameed la hadlay warbaahinta ayaa difaacay siyaasada
dowladda federaalka Soomaaliya, iyaga oo sheegay in ay jiraan dad siyaasiyiin ah oo arintan danno gaar ah ka leh.
‘’Waxaan aaminsannahay waxyaabahan dhacaya oo dhan in ay ka danbeeyaan dad
dano gaar ah leh oo kursi waayay, oo nabada ogoleyn, oo dowlad nimada ogleyn, oo
hormarka ogoleyn, wax ka dhib badan miyaa jiray qaraxyadii dalkan soo maray oo tirada
aad ogtihiin oo dad ay ku dhiman jireen, miyeeysan mudneyn in aan Alle ku
mahadnimo nabadan aan heysanno, miyeeysan mudneyn in lagu amaano dadkii ka
shaqeeyay, dadka oo dhan madax ma noqon karaan, aan dacaayada ka dhaafno
dowladda’’ ayuu yiri nabadoon Maxamed Xassan Xaad.
Nabadoon Axmed Diiriye ayaa dhinaciisa sheegay in aan loo baahneyn in
bulshada Soomaaliyeed la niyad jabiyo, isaga oo ku amaanay dowladda federaalka
doorka ay ka qaadatay iyo dadaalka ay ugu jirto nabadeynta dalka.
Odayaasha ayaa ku booriyay bulshada Soomaaliyeed in dowladda federaalka laga
sugo jawaabta ay ka bixineyso arintan ku saabsan shaqsiyga la sheegay in loo
dhiibay dowladda Itoobiya.
Hadalka odayaasha dhaqanka ayaa imanaya xili si weyn loo hadal hayo warku
saabsan ku wareejinta dowladda Itoobiya Cabdkariin Muuse oo la sheegay in laga
soo qabtay magaalada Gaalkacyo.
Dowladda Itoobiya ayaa dhinaceeda xaqiijisay in dowladda Soomaaliya u soo
gacan –galisay Cabdikariin Muuse Qalbi –Dhagax, laakiin dowladda federaalka
wali kama aysan soo saarin war rasmi ah
marka laga soo tago taliyaha hay’adda nabad-sugida Qaranka Cabdullaahi Maxamed
Cali Sanbaloolshe oo arintan ku tilmaamay mid ‘’ Xasaasi ah ‘’ oo laga hadli
doono waqtiga ku haboon.
C/raxmaan Diini,
Hiiraan Online
[email protected]
