Tababar caafimaad loo qabtay ardey ka kala soctay Jaamacadaha Muqdisho
Jimco, May 19, 2017 (HOL) -Tababar maalin socday oo ku
saabsanaa barashada cudurka Boog-calooleedka (Peptic Ulcer Disease) ayaa shalay
lagu qabtay magaalada Muqdisho, waxaana ka faa’iideystay boqolaal ka mid ah
ardayda wax barata kuliyadaha Caafimaadka ee 12 Jaamacadood oo ku yaalla
magaalada Muqddisho.
Waxaa soo qaban-qaabiyey tababarkan aqoon kororsiga ahaa Ururka dhaqaatiirta
ardayda Soomaaliyeed (Somali Medical Students Association) SOMSA, iyadoo
casharo ku saabsan cudurkan uu halkaas ka bixiyey Prof. Cismaan Maxamuud Dufle
oo ka tirsan dhaqaatiirta Soomaaliyeed kuna taqasusay cudurada beerka, caloosha
iyo dheefshiidka.
Prof. Dufle oo sidoo kale ah Senator ka tirsan aqalka sare
ee Baarlamanka Somalia ayaa ugu horeyn wax lagu farxo oo ugub ah ku tilmaamay
in ardayda caafimaadka ee 12 Jaamacadood ay meel kaliya ku kulmaan si ay
aqoontooda u kororsadaan, wuxuuna ka waramay ujeedada tababarada noocan ah
leeyihiin iyo sida loogu baahan yahay in looga faaiideysto.
Dhinaca kale, Prof. Dufle ayaa guda galay casharkiisa, isagoo si faahfaahsan
uga waramay waxaa u yahay cudurka Boog-calooleedka, sababaha keena
dhibaatooyinka uu u geysto dadka uu haleelo iyo hababka looga hortago, loona
daweeyo, wuxuuna cudurkan ku sifeeyey mid dilaa ah oo loo baahan yahay in lala
dagaalamo, isagoo tilmaamay in cudurkan uu yahay mid bulshada Soomaaliyeed ku
badan, sidaas awgeedna uu u doortay mowduucan.
Waxaa Profku uu u mahad celiyey ururka SOMSA ee soo qaban-qaabiyey aqoon
kororsigan, iyo ardayda ka faa’ideystay intaba wuxuuna ku baaqay in la
joogteeyo tababarada noocan ah si garaadka ardayda Soomaaliyeed oo ah
hogaamiyeyaashii berito kor loogu qaado.
Prof. Dufle ayaa sidoo kale si saraaxad leh uga jawaabay su’aalo ku saabsanaa
cudurka laga hadlayey kuwaasoo ay soo jeediyeen qaar ka mid ah ardayda
Jaamacadaha ee loo qabtay tababarkan.
Maxamed Faarax Ciise (Gaashaan) oo ka mid ahaa Wasiir ku-xigeenadii soo maray
Wasaarada caafimaadka xiligii dowladii Kacaanka oo hadalo kooban ka jeediyey
halkaas ayaa ku booriyey ardayda iney ka faa’ideystaan tababarada noocan ah oo
uu sheegay iney kor u qaadeyaan garaadkooda aqooneed.
“Tababarkan la xiriiray Cudurka Boog calooleedka waa mid aad u muhiim ah oo loo
baahnaa maxaa yeelay shacab Soomaaliyeed oo fara badan ayuu dhibaatooyin badan
ku hayaa” ayuu yiri Maxamed Faarax Ciise (Gaashaan).
Guddoomiyaha ururka Ururka dhaqaatiirta ardayda Soomaaliyeed C/llaahi Maxamuud
Tuuryare oo gebagebadii munaasabadaas ka hadlay ayaa u mahad celiyey Prof.
Dufle, ardayda ka faa’iideystay tababarkan iyo martida kala soo qeyb gashay
intaba, wuxuuna xusay in ururka SOMSA uu mar walba qabto tababarada noocan ah
si kor loogu qaado aqoonta ardayda Soomaaliyeed ee ku howlan barashada
Caafimaadka.
Waxaa sidoo kale Munaasabadan hadalo ka jeediyey qaar ka mid ah masuuliyiinta
Jaamacadaha, aqoonyahano iyo xubno kale oo ka qeyb galay dhegeysiga casharkan,
iyadoo dhinaca kale ardayda ka faa’iideysatay tababarkan ay sheegeen iney wax
badan ka kororsadeen, waxayna u mahad celiyeen Prof. Dufle iyo Ururka SOMSA oo
qabsoomidiisa iska kaashaday.
Mas’uuliyiintii goob jooga ka aheyd tababarkan ayaa shahaadooyin uu bixiyey
ururka SOMSA waxay guddoonsiiyeen ardayda ka faa’ideysatay tababarkan waxayna
munaasabadaas ku dhamaatay jawi farxadeed.