Arbaco, May, 17, 2017 (HOL) – Wararka ka imaanaya Deegaanka Libooyo ee kuyaala xadka Soomaaliya iyo dalka Kenya ayaa sheegaya in halkaasi uu ka dhacay qarax Miino oo khasaaro uu ka soo gaaray dad shacab ah oo gaari ku safrayay. Dadka deegaanka ayaa ku waramay in gaari shacab saarnaayeen oo ka baxay deegaanka Libooyo kuna sii jeeday magaalada Gaarisa uu Qaraxu haleelay, waxaana khasaaro dhimasho uu ka soo gaaray qaraxaasi dadkii gaariga saarnaa. Qaraxa ayaa inta la xaqiijinayo waxaa ku dhintay afar qof oo ka mid ahaa rakaabkii gaariga saarnaa, halka tiro kalana ay ku dhaawacmeen.
Dadka dhintay iyo kuwa dhaawacmay ayaa dhamaantood ahaa shacab sida ay sheegeen goob jooogayaal. Ciidamada amaanka Kenya oo gaaray halka uu qaraxu ka dhacay ayaa halkaasi ka sameeyay howlgalo, lamana oga in ciidamada amaanka gacanta kusoo dhigeen dadkii ka dambeeyay qaraxaasi, waxaana qaraxan la tuhmayaa in loo dhigay ciidamada amaanka balse gaariga shacabka uu haleelay. Gudaha Kenya waxaa ka dhaca weeraro iyo qaraxyo inta badan lala eegto ciidamada amaanka, waxaana weeraradaasi lagu eedeeyaa ion ay ka dambeeyaan dagaalyahanada Al Shabaab ee ka dagaalama gudaha Soomaaliya.
C/raxmaan Diini, Hiiraan Online [email protected]