Wasiirka amniga Puntland oo amray in la toogto maxaabiista dilka ku xukuman
Sabti, Maarso, 04, 2017 (HOL) – Wasiirka Amniga Puntland Cabdi Xirsi Qarjab
ayaa soo jeediyay in si deg deg ah loo toogto maxaabiista dilalka ku xukuman ee
ku jira Xabsiyada Puntland.
Wasiirka amniga oo la hadlayay
warbaahinta gudaha ayaa wax laga xumaado ku tilmaamay in wali xabsiyad Puntland
ku jiray rag ka tirsan Al-Shabaab oo horay xukuno lagu riday.
“Wixii xabsiyada ku jira ee horay
loo xukumay waa in la laayo, ayagana waa na leynayaan sow mahan, kuwa inoo
xiran ee raashinka naga dhameeya, ee muddo sanad ayaa bariis siineynaa, kuwaas
dad xukuman waaye, maxaa u sii heysaneynaa”ayuu yiri Wasiirka Amniga Puntland.
Wasiirka ayaa intaa ku darray in
sanadkii la soo dhaafay boqolaal ruux oo ka tirsan Al-Shabaab lagu soo qabtay
deegaanada Garmaal iyo Garacad, kuwaasoo uu xusay in loo baahan yahay
Maxkamadda sare ee Puntland in go’aan ka qaadato.
Puntland ayaa horay xukuno dil ku
riday dhalinyaro badan oo lagu soo eedeeyay inay ka tirsan yihiin Al-Shabaab,
waxaana horay dilal ugu fulisay dhalinyaro badan oo ay sheegtay inay qeyb ka
ahaayeen dilalka qorsheysan ee deegaanadeeda ka dhaca.
Ugu danbeyntii, hay’adda xuquuqul
insaanka ayaa ugu baaqay Puntland in aysan ku deg degin xukunada dilka ah,
iyadoo bishii la soo dhaafay 7 dhalinyaro xukun dil ah ku ridday.
C/raxmaan Diini, Hiiraan
Online
[email protected]