Boqolaal ruux oo Isbitaalka Gaalkacyo loogu sameynayo qaliin indha fiiqis bilaash ah
Talaado, Maarso, 14. 2017 (HOL) - Mashruuc isugu jira
daweyn iyo indho fiiqis bilaash oo ay ka faaiideysteen kumanaan ruux ayaa ka
socda Isbitaalka magaalada Gaalkacyo ee gobolka Mudug oo ay maamusho heyadda
Mudug Development Organization.
Howshan samafalka ah oo soconeysa muddo shan cisho ah
ayaa dadka ka faa’iideystay waxay isugu jiraan barakacayaal iyo dad danyar ah
kuwaasoo aan wax lacag ah laga qaadeynin haba yaraatee sida uu sheegay
Agaasimaha Isbitaalka Indhaha Al-Nuur Dr. C/risaaq Axmed Dalmar oo hogaaminaya
dhaqaatiirta fulineysa Mashruucan.
Dr. Dalmar ayaa xusay in howshan samafalka ay dalka qeybo
ka mid ah ka soo wadeen sanadihii la soo la soo dhaafay, ayna rajeynayaan in
sanadaha soo socda ay sii wadaan.
“Hirgelinta howshan samafalka ah waxaa iska kaashanaya
dhaqaatiir Soomaali iyo ajnabi leh oo kala socota Heyadda Al-Nuur Foundation
Somalia oo aan madax u ahay iyo heyadda Al-Basar International Foundation ee
dalka Sacuudiga.
Waxaa uu intaa ku daray dhaqtarku in Mashruucan oo isugu
jiray Baaritaano, daaweyn, okiyaale qoris ay ka faaiideysteen dad gaaraya 4,560
qof, halka dad gaaraya 400 oo kale loo sameynayo qaliimo dhinaca indhaha ah,
isagoo xusay dadka ka faa’ideystay ay ka kala yimaadeen degaanada hoos taga
Galmudug iyo Puntland, wuxuuna hoosta ka xariiqay in mashruucan uu yahay
mid lacag la’aan ah oo loogu adeegayo bulshada Soomaaliyeed.
Qeybta hore ee mashruucan ayuu sheegay Dr. Dalmar in
dabayaaqadii todobaadkii hore lagu soo gebagebeeyey isbitaalka Al-Nuur ee
magaalada Muqdisho, halkaasoo indhaha loogu fiiqay dad gaaraya 500 oo qof oo ka
kala yimid xeryaha barakacayaasha iyo degaanada ku dhow Muqdisho, halka 5,600
oo qofna loo sameeyey baaritaano iyo daweyn.
Dr. Dalmar ayaa xusay Sanadkan 2017-ka ay u qorsheysan
tahay in si bilaash indhaha loogu fiiqo dad gaaraya afar kun oo qof oo ku kala
sugan Muqdisho iyo gobolada dalka qaarkood, isagoo intaas ku daray in
mashruucan ay gaarsiin doonaan magaalooyin ay ka mid yihiin Kismaayo, Baydhabo,
Jowhar, Cadaado, Dhuusamareeb, Gaalkacyo iyo meelo kale, wuxuuna u mahad
celiyey heyadda Al-Basar International Foundation ee dalka Sacuudiga oo
fududeysay taaba galka mashruucan, dhaqaatiir ka socotay dalka Pakistan oo
howshan kala qeyb qaatay, shaqaalaha Isbitaalka Al-Nuur iyo intii kale ee gacanta
ka geysatay.
Isbitaalka Gaalkacyo ayaa Mashquul fara badan maalmahan
laga dareemayey, waxaana soo buuxiyey dad u badan kuwo da’ah oo isugu jiray rag
iyo haween kuwaasoo loo sameynayey qaliimo bilaash ah.
“Araggeygu waa taam Dr. Dalmar iyo kooxdiisa waan u
duceynay qeyr fara badan ILAAHAY ha siiyo, wax dhibana Alle ma tusiyo, wax weyn
ayuu noo qabtay muraadkiisa ILAAHAY ha u sahlo” sidaas waxaa yiri hooyo ka mid
aheyd dadkii waayeelka ahaa ee ka faa’iideystay mashruucan.
Ugu dabeytii, dadka danyarta ah ee sida bilaashka ah uga
faa’iideystay mashruucan samafalka ah qaarkood oo saxaafada la hadlay iyagoo
wajiyadooda ay ka muuqatay farxad ayaa sheegay in loo sameeyey daweyn iyo
qaliimo ay u baahnaayeen, aysana jirin wax qarash ah oo laga qaaday, iyagoo u
mahad celiyey maamulka Isbitaalka indhaha Al-Nuur iyo hay’adihii kale ee
gacanta ka geystay howshan samafalka ah.
C/raxmaan Diini, Hiiraan Online
[email protected]