Madaxweyne Farmaajo oo ku dhawaaqay todobaad Alle Bari iyo Roobdoon ah
Axad, Maarso, 12, 2017 (HOL) - Madaxweynaha Soomaaliya Maxamed C/llaahi
Farmaajo ayaa ugu baaqay shacabka Soomaaliyeed in ay Toddobaadkaan
gudihiisa sameeyaan isu soo baxdyo ALLE bari iyo Roob doon ah.
Madaxweynaha oo ay wehliyaan Wasiirrada Warfaafinta, diinta, guddoomiyaha
gobolka Banaadir, agaasimeyaala ka socda wasaaraha qaar iyo Culimada
Soomaaliyeed qaarkood, ayaa shir saxaadeed ku qabtay xafiiskiisa oo oo uga
hadlay xaaladaha abaaraha daran ee ka jira Soomaaliya.
Madaxweynaha, ayaa sheegay in xaaladda abaarta ay la
socdaan cudurro halis ah, isla markaana dadka ay bilaabeen in ay ka soo
qaxaan gobollada ay dhacdooyinkaasi ka taagan yihiin, waxa uu boggaadiyey
dedaallada ay wadaan
Ra’iisul wasaaraha iyo guddiga Qaranka ee guddiga Abaaraha Soomaaliya oo
sameeyey isku dayo wanaagsan ilaa welina wada.
Sidoo kale Madaxweynaha Farmaajo, ayaa ugu baaqay
shacabka Soomaaliyeed in maalinta Talaadada ee soo socoto ay sameeyaan isu soo
baxyo ALLE Bari iyo Roob doon, si ALLE nooga dulqaado abaaraha dalka aafeeyey
xilligaan.
Sheekh Nuur Baaruud Gurxan oo ka mid ah culimada
Soomaaliyeed, ayaa sheegay in dambiyada ka dhacay Soomaalida dhexdooda in ay
keeneen abaaraha, loona baahan yahay in laga Towbad keenno, si Khataraha ay
abaartu ka mid tahay ALLE nooga Qaado.
Madaxweynaha ayaa todobaad ka hor ku dhawaaqay inay
ka jirto Soomaaliya xaalad musiibo qaran, iyadoo dad iyo duunyo ay u dhinteen
abaarta ka jirta dalka.
C/raxmaan Diini, Hiiraan Online
[email protected]