Jidadka Muqdisho qaarkood oo maanta u xiran kulanka baarlamaanka
Arbaco, Marso, 01, 2017 (HOL) - Qaar ka mid ah Waddooyinka Muqdisho ayaa
saaka oo Arbaco ah loo xiray Kalfadhiga koowaad ee Baarlamaanka oo saaka ka
furmaya xarunta Golaha shacabka, iyadoo ammaanka si aad ah loo adkeeyay.
Kalfadhiga koowaad ee Baarlamaanka
ayaa lagu ansixin doonaa ra’iisul wasaaraha magacaaban Xasan Cali Kheyre,
iyadoo madaxweyne Farmaajo uu si rasmi ah u furi doono kalfadhiga koowaad ee
baarlamaanka.
Inta badan isgoysyada muhiimka ah
iyo jidadka halbowlah u ah isku socodka dadka iyo gadiidka ayaa lagu arkayaa ciidamada amniga
oo u diidaya in la isticmaalo.
Sidoo kale Ciidamada ayaa taagan
dhamaan waddooyinka ka yimaada dhinaca wadada Wadnaha ee soo aada wadada Maka
Al-Mukarama, waxaana loo diidayaa gaadiidka dhankaas soo aadaya.
Labadii maalmood ee la soo
dhaafay ayaa wado xirista aheyd mid soo noq-noqotay, waxaana shalay xirneyd
wadada aada dekeda Muqdisho.
Ugu danbeyntii, maalmihii doorashada
ayaa waddooyinka Muqdisho aheyd mid xirneyd, oo ay adkeyd in la isu gudbo,
iyadoo meelaha lagu gooyay dhagxaan.
