Mas’uuliyiinta DF Soomaliya oo la faray in mudo 14 cisho ah ku soo diiwaangaliyaan ilaaladooda
Arbaco, June, 14, 2017 (HOL) - Wareegto
ka soo baxday xafiiska wasiirka wasaaradda amniga Gudaha Soomaaliya Maxamed
Abuukar Ducaale Isloow ayaa looga hadlay
go’aannada ku saabsan sugidda amniga mas’uuliyiinta dowladda.
Wsiirka amniga gudaha ee xukuumadda Soomaaliya Maxamed Abuukar Ducaale Isloow
ayaa sheegay in muddo 14 cisho ah mas’uuliyiinta
dowladda ku soo diiwaan geliyaan ilaaladooda gaarka ah.
Wasiirka ayaa sheegay in tani qeyb ka tahay go’aankii gollaha wasiirada ee xukuumadda
Soomaaliya ee ku aadanaa sugitaanka amniga iyo xasalinta amniga Caasimadda, go’aankasi
oo ku taariikheysnaa 11 May ee 2017.
Go’aanka golaha wasiirada faqradda 7-aad oo uu dhigan sidan “Waxaa laga
mamnuucay dhammaan qof kasta oo ay ku jiraan mas’uuliyinta dowladda in
magaalada Muqdisho aysan ku dhex-wadan karin ilaalo ka badan Afar askari iyo
ugu badnaan Labo gaari, mana qaadan karaan qori ka wayn AK47”
Wasiirka ayaa u qabtay xildhibaannada Labada Aqal, xubnaha golaha wasiirada
iyo dhammaan mas’uuliyiinta kale ee dowladda in muddo afar iyo toban maalmood
(14) gudahooda ay ku soo diiwaan geliyaan ilaalada gaarka ah iyo hubka ay
sitaan, waxayna diiwaan gelinta ka bilaabaneysaa xarunta hogaanka dambi
baarista (CID)
Amarkan ka soo baxay wasaarrada amniga gudaha ayaa imanaya xili maalmihii ugu danbeeyay magaalada Muqdisho ka soconayeen howlgalo hub ka dhigis ah oo caasimada looga nadiifinayo hubka sharci darrada ah, waxaana howlgaladan ka qeybqaadanaya ciidamo isku dhaf ah oo ka kooban, militariga, nabad-sugida iyo booliiska Soomaaaliyeed.
C/raxmaan Diini, Hiiraan Online
[email protected]
