Ciidamada Kenya oo weerar ka geystay gobolka Jubbada hoose
Arbaco, July, 26, 2017 (HOL) – Ciidamada Kenya ee qeybta ka ah
howlgalka midowga Africa AMISOM ayaa lagu waramayaa in subaxnimadii hore ee
saakay weerar culus ku qaadeen deegaan lagu
magacaabo Lagta oo u dhexeeya Kulbiyow iyo Raaskaambooni ee gobolka Jubbada
Hoose, sida ay VOA u sheegeen dadka deegaanka.
Weerarkan
ayaa la sheegay in ciidamada Kenya u adeegsadeen taangiyo, waxaana la sheegay
inay rasaas xooggan is weydaarsadeen maleeshiyada Al-Shabab oo ku sugan
degaanka Lagta.
Ma cadda ilaa iyo hadda khasaaraha ka dhashay weerarkan, waxaana
dadka degaanku sheegayaan in weli is hor fadhiyaan labada dhinac.
Dhinaca
kale ciidamada dawladda Soomaaliya ayaa la sheegay inay dhaqdhaqaaq milatari ka
wadaan inta u dhaxaysan Yoontooy iyo Buuloguduud.
Warar hordhac ah ayaa sheegaya in ciidanka ay kusii jeedaan
deegaanka Guulguduud, halkaasi oo muddo bilow ah ay ciidamada marna tagaan marna
ka baxaan.
Mid ka mid ah baabuurta ciidanka ayaa la sheegay in qarax lala
eegtay inkastoo aysan caddayn in khasaare ka dhashay.
C/raxmaan Diini, Hiiraan Online
[email protected]
