Weeraro laga cabsi qabo doorashada Kenya
Arbaco, July, 26, 2017 (HOL) – Hay’addaha
amniga dalka Kenya ayaa ka digay weeraro ay geystaan Al-Shabaab iyo kooxo kale
inta lagu guda jiro doorashada la filayo dhawaan in ay ka dhacdo dalka Kenya.
Kenya waxa ay sheegtay in heegan buuxa la geliyay dhammaan hay’addaha kala
duwan ee Ammaanka,islamarkaana ay jirto cabsida Al-Shabaab.
Sii hayaha xilka wasiirka amniga gudaha dalka Kenya Fred Matiang’i ayaa sheegay in dowladda
diyaarisay diyaarado dagaal oo lagu ilaali doono goobaha ay dadku codadkooda ka
dhiibanayaan.
Waxaa uu sheegay in baqdinta ugu weyn ee la qabto tahay in ay dhacaan
qaraxyo iyo afduub ay geystaan Al-shabaab iyo kooxo kale.
‘ Ciidamada Ammaanka waa in ay indhahooda furaan oo ay ka hortagaan weeraradaasi
maadaama ay jirto cabsi weyn ” ayuu yiri Fred Matiang’i .
Waxaa uu sheegay in ay ilaalinta goobaha codeynta ay ka qeyb qaadan doonaan
ciidamo booliis ah oo aad u badan.
” Waxaan diyaarinay ciidamo badan oo ka hortagi doona weeraradaasi, waxaana
isku dayaynaa in doorashadda ay dhamaato iyadoo aysan Al-shabaab weerar geysan”
ayuu yiri Markale Fred Matiang’i .
Doorashadda madaxtinimadda dalka Kenya ayaa lagu waddaa in ay bilaabato 08da
bisha soo socta ee Augusto ee sanadkan 2017.
C/raxmaan Diini, Hiiraan Online
[email protected]
