Guddiga amniga baddaha oo shir ku yeeshay Muqdisho
Talaado, July, 25, 2017 (HOL) – Ra’iisl
wasaare ku-xigeenka xukuumada federaalka Soomaaliya Mahdi Maxamed
Guuleed Khadar ayaa shir guddoomiyey kulanka guddiga amniga Badaha, kaas oo
looga hadlayay arrimo dhowr ah oo la xiriira Badda.
Guddigan oo loo sameeyey in xiriir joogto ah la yeeshaan hay’addaha kala
duwan ee dawladda kuwaas oo ka shaqeeya arrimaha badda ayaa bishii hal-mar kulan
ku yeesha Xafiiska Ra’iisul Wasaaraha.
Waxana kulanka ka soo qeyb galay lix Wasaaradood oo ay khuseyso arrimaha baddaha,
sida, Wasaaradda Kaluumeysiga, Amniga, Gaashaandhigga, Arrimaha dibada,
Maaliyadda, Caddaaladda iyo Xeer ilaaliyaha Qaranka iyo wafdi ka socday Maamul
Goboleedyada oo si dhaw ula socda xaaladda badaha Soomaaliyeed.
Wasiirka Kuluumaysiga iyo Khayraadka Badda Dr. Cabdiraxmaan Maxamed Cabdi
Xaashi, ayaa sheegay in la samaynayo sharcigii lagu dhisi lahaa ciidanka
ilaaliya xeebaha oo loo yaqaan (Goast Guard) iyo sidii wax looga qaban lahaa
sharci darrada looga kaluumeysto xeebaha Soomaaliya, sidoo kale waxaa uu
tilmaamay in shirkan looga hadlay xoojinta hay’addaha Garsoorka.
Dhinaca kale wasiirka ayaa sheegay in kulankan uu hor-u-dhac u yahay shir
kale oo ka dhici doona dalka Uganda, oo looga hadlayo amniga baddaha
Soomaaliya, kasoo ay ka qayb galayaan dhammaan maamul goboleedyada iyo madax ka
socota dawladda dhaxe.
Shirka ayaa sidoo kale waxaa lagu martiqaaday beesha caalamka sidii ay
hay’addaha dhaqaalaha bixiya u taageeri lahaayeen qaabka loo sugayo amniga
dalka iyo kan badaha Soomaaliya.
C/raxmaan
Diini, Hiiraan Online
[email protected]