Adna Adan oo loo magacaabay ergeyga Soomaaliland ee wada hadalada Soomaaliya
Talaado, July, 25, 2017 (HOL) - Madaxweynaha Somaliland Axmed Maxamed Siilaanyo ayaa marwo
Adna Aadan Ismaaciil u magacaabay ergeyga wada hadalada Somaliland iyo
Soomaaliya, halka wasiirkii xiriirka goleyaasha uu xilkii ka qaaday,isla
markaana mas'uul kale magacaabay.
“Waxaan
kaga mahadcelinayaa muddadii aad soo haysay xilka qaranka ee Wasiirka
Wasaaradda Xiriirka Golayaasha, Cilmi-baadhista iyo Technology-yada. Xilalka
Qaranka ayey dabcigeed tahay in ay meerto noqoto oo kolba cid hanan karta loo
dhiibo.
Sidaa
darteed, waxaan gartay in aan kaa qaado xilkaa, waxaanan kaa rajaynayaa
in aad si niyad sami ah ugu wareejiso Mudane, Axmed Xaaji Daahir Cilmi oo aan
xilkaa u soo magacaabay”ayaa lagu yidhi qoraal ka soo baxay madaxtooyadda.
Wasiirkan
xilka laga qaaday Cali Xaamud Jibriil ayaan la sheegin sababta xilka looga
qaaday,halka wasiirka cusub ee la magacaabay uu hore u ahaan jiray wasiirka
warfaafinta dawladdii UDUB ee Daahir Rayaale.
Dhinaca
kale, madaxweynuhu wuxuu xil cusub u magacaabay marwo Adna Aadan oo laga
dhigay ergayga gaarka ah ee wada hadaladda Somaliland iyo Soomaaliya.
“Madaxweynaha
Jamhuuriyadda Somaliland, Mudane Axmed Maxamed Siolaanyo, waxaa uu digreeto
Madaxweyne oo summadeedu tahay JSL/M/XERM/249-4921/072017 uu maanta ku magacaabay Ergeyga Gaarka ah ee Wada-hadallada Dawladda Jamhuuriyadda
Somaliland iyo Dawladda Soomaaliya.”ayaa lagu soo saaray War-saxaafadeedkaasi.
Marwo
Adna Aadan ayaa xukuumaddii Daahir Rayaale ahayd wasiirka arrimaha dibada
Somaliland, sidoo kale, waxay magaaladdda Hargeysa ku leedahay cisbitaal weyn
oo caan ka ah Somaliland.
Barkhad-ladiif
M. Cumar, Hiiraan Online
[email protected]
Hargeysa,
Somaliland.