Soomaaliland oo sheegtay in Sacuudiga uu xayiraadii ka qaaday dhoofka xoolaha Soomaalida
Axad, July, 23, 2017 (HOL) – Wasiirka Wasaaradda Xanaanadda Xoolaha Soomaaliland C/llaahi
Maxamed Daahir Cukuse ayaa sheegay in Sucuudigu xayiraadii ka qaaday xoolaha
Soomaalidda oo muddo xayirnaa.
Wasiir
Cukuse waxaa kale oo uu sheegay in dalka Imaaraadka Carabta uu balanqaaday inuu
xoolaha nool inaga iibsan doono oo uu Imaaraadkuna noqon doono suuq labaad oo
loo helay xoolaha Soomaalidda.
“ Inaan umadda ugu bushaareeyo
iibkii xoolaha nool ee tagi jiray Sucuudi Arabiyo, oo muddo inaga xayirnaa in
la noo furay, dadaal badan iyo baryadda ilaahay oo la inaga aqbalaly ka dib
dalka Boqortooyadda Sucuudi arabiya, waxay inoo ogolaadeen inaynu dirno
moosinka xajka xoolihii noolaa ee aynu awalba diri jirnay”ayuu yidhi Cukuse oo
ka hadlayey xayiraadii uu Sucuudigu ka qaaday xoolaha Nool ee Soomaalidda.
Waxaa kale oo uu sheegay in
Imaaraadka Carabta uu ogolaaday inuu noqdo suuq kale oo xoolaheena loo
dhoofiyo, waxaanu yidhi “dalka Imaaraadka Carabta socdaalkii aanu ku tagnay ee
madaxweynuhu hogaaminayey waxa uu naga ogolaaaday inuu noqdo dal kale oo aynu
xoolaha u dhoofino oo ganacstadda waaweyn ee Sucuudiga ee sayladaheena wax ka
iibsada ay ku soo biiraan tujaar kale oo carbeed oo dalka imaaraadka Carabtu
leeyahay, waxaanu doonaynaa in saylado kale oo xoolaha loo dhoofiyo aanu
raadino”.
Si
kastaba ha ahaatee, laf dhabarka dhaqaalaha Soomaalidu waa xoolaha nool,
waxaana muddo ka xayirnaayeen suuqa ugu weyn ee loo dhoofiyo ee Sucuudiga,
nasiib wanaagse xukuumaddu waxay sheegtay inuu xayiraadii ka qaaday taas oo
rajo iyo yididiilo galinaysa xoolo dhaqatadda Soomaalidda.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
