Dowladda oo faah faahin ka bixisay maxaabiis laga soo daayay xabsi ku yaala dalka Itoobiya
Axad, July, 23, 2017 (HOL) - Dowladda Soomaaliya ayaa war-saxaafadeed ku
faah faahisay 114 muwaaddin oo Soomaali ah oo laga soo daayay xabsi ku yaalla
Itoobiya.
War-saxaafadeedka ayeey dowladdu ugu mahad-celisay xukuumadda Itoobiya iyo is
maamulka Soomaalida ee dalka.
“Dadaal ballaaran oo ay sameysay Xukuumadda Jamhuuriyadda Federaalka
Soomaaliya ka dib, ayaa xalay waxaa garoonka diyaaradaha Muqdisho ka soo degey
114 muwaaddin oo Soomaali ah oo laga soo daayay xabsi ku yaalla magaalada
Jigjiga, dowladda Soomaaliya waxay u mahad celisay dowladda federaalka Ethiopia
iyo dowlad deegaanka Ismamulka Soomaalida saaxiibtinnimada ay muujiyeen ee ay
kaga dhabeeyeen siideynta maxaabbiista, taas oo ay hore ugu ballan-qaadeen
Madaxdeenna.”
“Tallaabadan ayaa qeyb ka ah hindise niyad wanaag ah oo lagu xoojinayo
xiriirka saaxiibtinimo iyo midka derisnimo ee labada dal ee Soomaaliya iyo
Ethiopia. arintaani waxay ka dambeysay ballanqaadkii dowladda Soomaaliya ee
ahaa in ay ka shaqeyso in Maxaabbiista Soomaalida ah ee ku xiran dalal dhowr ah
ay u howlgasho sidii loo sii deyn lahaa ama ay xabsigooda ugu dhammaysan
lahaayeen dalka gudihiisa. danjiraha Soomaaliya ee Addis Ababa, Maxamed Cali
Nuur, oo maxaabbiistan ka soo qaaday JigJiga ayaa markii ay Muqdisho ka soo
degeen wuxuu ku wareejiyay hey’adaha booliiska iyo garsoorka.”
Maxabiistan ayaa noqonaya tiradii ugu badneyd ee Soomaali ah oo ay dowladda
ka soo celiso dalka dibadiisa, balse wali boqollaal iyo kumamaan Soomaali ah
ayaa ku xiran xabsiyada dibadda.
C/raxmaan Diini, Hiiraan Online
[email protected]