Madaxweynaha Turkiga oo eedeyn kulul u jeediyay Israa’iil
Axad, July, 23, 2017 (HOL) - Madaxweynaha Turkiga Recep Tayyib Erdogan ayaa
ku eedeeyay Israel inay awood xad dhaaf ah u adeegsadeen dadka Falastiniyiinta
ee ku dibad baxayay masaajirka barakeysan ee Al Aqsa ee ku yaala magaalada
Qudus.
Isku dhacyo dhex maray Ciidamada Israa’iil iyo dhalinyaro Falastiniyiin ah
ayaa waxaa ku dhintay illaa saddex Falastiniyiin ah.
Maamulka Israel ayaa jimcihii la soo dhaafay soo saaray amar ah in ragga
da’dooda ka yar tahay 50-ka sano ay salaada jimcaha ku dukadaan barxada
masaajidka barakeysan ee Al Aqsa.
Madaxweyne Erdogan ayaa wax laga xumaado ku tilmaamay in Israel ay dadka
rayidka ah ay beegsato, isla markaana u adeegsato awood dheeraad ah.
Sidoo kale waxaa uu caddeeyay in aan loogu dulqaadan karin Israel
tallaabooyinka ay ku bartilmaameedsaneyso dadka rayidka ah.
Falastiniyiinta ayaa aad uga soo hor-jeestay awaamiirta cusub ee ka soo
baxay Israel, waxaana Madaxweynaha Falastiniyiinta Maxamuud Cabaas uu ku
dhawaaqay inuu jaray dhamaan xiriirkii kala dhaxeeyay Israa’iisal.
C/raxmaan Diini, Hiiraan Online
[email protected]