Soomaalilnd oo xustay 130 sanno ka hor wakhtigii Khariirada aduunka lagu daray
Sabti, 22, 2017 (HOL)- Wasaaradda arrimaha dibada Somaliland
ayaa xus u samaysay boqol iyo sodan sanno ka hor wakhtigii lagu daray Maabka Adduunka ka hor intii aanay Soomaaliya ka mid noqon.
Muddada Khariirradda Somaliland
ka mid ahayd Maamka Dunida ayaa laga jaray Soddon sannadood waxaana laga soo
taariikheeyay 1887 markii Maxmiyadda Ingiriisku timid Somaliland.
Madaxda sare ee wasaaradda
arrimaha dibada, hawl wadeennada wasaaradda, siyaasiyiin iyo aqoon yahanno ayaa
qayb galay xuskan loo sameeyay boqolka sanno eek a soo wareegay intii
Somaliland jirtay ama taariikhda dawladnimada lahayd.
Wasiirka arrimaha dibada Somaliland
ayaa sheegay in Somaliland taariikh fac weyn leedahay laakiin, taariikhdeeda
cusub soo bilaamatay markii ay ka mid noqotay xuduudaha caalamiga ah ee
dunida “ Taariikhda cusub waxay soo
bilaamatay 20-July-1887. Waxa caawa laga jooga 130 sannadood maalintaas oo aynu
rasmi uga mid noqonay maxmiyadihii Ingiriiska. Laga bilaabo maalintaas
Somaliland waxay ku lahayd maamka dunida bogcad u gaar ah oo dal gaar ah ayay
ahayd,” sidaas ayuu yidhi wasiir Sacad.
“Maalintaas waxa ka soo wareegay
130 sanno oo buuro ah laakiin, caawa xussi mayno 130-ka sannadood, waxaynu
xusayna boqol guuro(100 sanno guuro) waayo 30 sannadood ayaynaan maam inoo gaar
ah ku lahayn caalamka, waxaynu ka mid ahayn Maamka Soomaaliya, boqolka sanno ee
kale gooni baynu u taagnayn oo maamka caalamka ugu taallay Somaliland,” Sidaas
ayuu yidhi wasiir Sacad.
Wasiirka arrimaha dibada
Somaliland waxa uu sheegay in bulshada Somaliland xamaasad badan haysay markii
1960-kii xorriyadda ka heleen Ingiriiska, islamarkaana doonayeen in la isu
keeno shanta Soomaalida oo noqota Waddan cudud leh oo lagu tashado marka Geeska
Afrika la joogo kaas oo muwaadiniintu u wada siman yihiin una horseeda barwaaqo
“Nasiib darro 30-kii sannadood ee aynu qaybta ka ahayn Soomaaliya hammigeenii
iyo himiladeenii may xaqiiqoobin; halkii aynu ka filaynay horusocod, barwaaqo,
caddaalad iyo sinnaan waxa inagu dhacay caddaadis, takoor, dil, dhac iyo burbur
runtii dadkeenu u adkaysan waayeen oo ka dhiidhiyeen horraantii sideetamaadkii,
halgankaas oo ku dhammaaday xasuuqa iyo burburinta hantideenii iyo
magaalooyinkeenii markii dambena aynu ka xorownay; 1991-kii markii la isugu
yimid shirkii Burco ayay dadkeenu isla garteen in aanay arrintaasi ina anfacayn
ee aynu la soo noqono xorriyaddeenii aynu iska dhiibnay 1960 inaga oo xor ah,
maalintaas ayay inoo bilaamatay taariikhda cusub ee aynu maamka ku naalo,” ayuu yidhi wasiirku.
Wasiir ku xigeenka Arimaha
Dibadda md Kaysar Cabdilaahi Axmed, Wasiirru-dawlaha Arimaha Dibadda Somaliland
Maxamed Mixile Boqore, Xeer ilaaliyaha guud ee qaranka Somaliland Xasan Axmed
Aadan, Aqoonyahan Dr Xuseen Bulxan ayaa
dhamaantood ka hadlay xuskan.
Barkhad-ladiif M. Cumar,
Hiiraan Online
[email protected]
Hargeysa, Somaliland.