Madaxweyne Farmaajo oo shir guddoominaya kulan looga hadlayo abaarta ka jirta dalka
Talaado, Feberaayo, 28, 2017 (HOL) – Saacadaha soo socda
ayaa lagu wadaa in magaalada Muqdisho uu ka furmo shir weyne heerkiisu sareeyo
oo looga hadli doono xaalada abaarta ka jirta dalka Soomaaliya oo saameyn xoog
leh ku yeelaneysa nolasha dadka iyo duuniyada intaba.
Madaxweynaha dowladda Soomaaliya Max’ed Cabdullaahi Farmaajo
oo kulankan shir guddoomin doona, ayaa sidoo kale waxaa la filayaa in ay ka soo
qeybgalaan xubno ka kala socda dowlad gobolleedyada dalka, wakiilada beesha
caalamka iyo hay’addo caalami ah oo ka shaqeeya arimaha banni’aadanimada.
Kulanka ayaa gaar ahaan warbixin looga dhageysan doonaa Max’ed
Cuma Carte oo ah guddoomiyaha gudiga abaaraha heer Qaran oo shirka ka hor jeedin doona warbixin la xiriirta xaalada
abaarta dalka ka jirta.
Shirkan oo ka dhacaya xarunta Xalane ayaa la filayaa in
halkaa dhaqaale loogu yabooho dadka ay abaartu saameysay, gaar ahaan hay’adda
calaamiga ah ee shirka ka qeybgali doona oo la filayo in ay soo bandhigaan
qorshayaasha u degsan si wax looga qabto abaarta.
Gobolada dalka Soomaaliya ayaa waxaa
ka jira abaaro daran oo saameeyay dadka iyo xoolaha, waxaana deegaanada qaar
gaajo iyo haraad ugu geeriyooday dad iyo xoolaba.
Hey’addaha gargaarka ayaa sheegaya
in illaa 600,00 oo caruur ah ay qatar ugu jiraan xaalad nafaqo darro, iyadoo
loo baahan yahay in la gaarsiiyo gargaar deg deg ah.
C/raxmaan
Diini, Hiiraan Online
[email protected]
