Dowladda Soomaaliya oo laga dalbaday in ay fargaliso Xiisada ka taagan degmada Beled-Xaawo
Khamiis, December, 28, 2017 (HOL) – Maamulka
Jubbaland ayaa ka hadlay xiisada ka taagan magaalada Beledxaawo ee gobolka
Gedo, kadib markii darbiga Kenya ay ka dhiseyso xuduuda labada dal, ay gudaha u
soo gelisay qaybo ka mid ah degmada.
Arrintan, ayaa ka careysiisay bulshada ku dhaqan
Degmada Baled Xaawo, waxayna maalmihii la soo dhaafay dhigeen Dibadbaxyo
rabashado wata, waxaana jiray isku dhacyo dhaxmaray iyaga iyo ciidamada Kenya.
Wasiirka Amniga Jubbaland oo gaaray degmada Beled-Xaawo,
ayaa kula kulmay Maamulka Degmada iyo qaybaha bulshada, waxaana uu u sheegay
inaanan Kenya loogu dulqaadan doonin sida uu hadalka u dhigay Xadgudubka ka dhanka ah dhulka Soomaaliya.
Laakiin dhinaca kale waxaa uu ugu baaqay shacabka
ku dhaqan degmada Beled-Xaawo in xasiloonnida ilaaliyaan kana fogaadaan wax
kasta oo dhibaato keeni kara.
Wuxuu sheegay Wasiir Janan in muhiim ay tahay in shacabka ay isdejiyaan,
islamarkaana dalka dowlad uu leeyahay, loogana dambeeyo wixii arrimahaasi ku
saabsan, wuxuuna dowladda ka dalbaday in arrintan ay soo farageliso.
Kenya, ayaa kol hore sheegtay in xuduuda labada
dal ay ka dhisi doonto darbi kala qaybiya, iyadoona tallaabadaasi ku sheegtay
mid ay kaga hortageyso weerarada kaga imaanaya Ururka Al-Shabaab, balse waxaa
muuqata in qorshaheedu uu sidaasi ka fogyahay.
C/raxmaan Diini, Hiiraan Online
[email protected]