Dagaal culus oo xalay ka dhacay degmada Afgooye ee gobolka Shabeellaha Hoose
Talaado, December, 26, 2017 (HOL) – Faah
faahin dheeraad ah ayaa ka soo baxaya dagaal culus oo fiidnimadii xalay ka
dhacay degmada Afgooye ee gobolka Shabeellaha Hoose, kaddib markii xoogaga
Ururka Al-Shabaab ay weerareen Laba kontorool oo ciidamada Dowladdu ku
leeyihiin dhinaca Galbeed ee degmada.
Xoogagga Al-shabaab ee weerarka soo qaaday ayaa la sheegay in ay wateen
gaadiidka dadweynaha, iyagoo weerar lama filaan ah ku qaaday ciidamada
dowladda.
Dadka degmada ayaa sheegay in dhowr jiho ka soo weerar tageen
dagaalamayaasha Al-shabaab oo dhinaca kale iska caabin xoog leh kala kulmay ciidamada
dowladda Soomaaliya.
Waxaa jira khasaare soo kala gaaray dhinacyda uu iska horimaadku dhaxmaray
laakiin dhab ahaan lama oga tirada rasmiga ah ee khasaaraha ka dhashay
dagaalka.
Al-Shabaab ayaa kordhiyay weerarrada ka dhanka ah degmada Afgooye, waxaana
uu weerarkan noqonaya kiisii saddexaad bishan oo keliya ay ka gaysteen
degmadaasi.
C/raxmaan Diini, Hiiraan Online
[email protected]
