Xarrakada Al-shabaab oo fagaare ku toogatay Shan dhalinyaro ah
Isniin, December, 25, 2017 (HOL) – Xarrakada Al-shabaab ayaa shalay gelinkii
danbe meel fagaaro ah deegaanka Iidaale oo ka tirsan gobolka Baay waxaa ay ku
toogteen Shan dhalinyaro ah oo ay ku eedeeyeen in ay la shaqeynayeen sirdoon
Caaalami ah iyo kuwa Maxalliga ah.
Degaanka Iidaale oo qiyaastii magaalada Baydhabo u jira 60-KM ayaa lagu toogtay
dhalinyaradan oo ay ku eedeeyeen Al-shabaab in ay la shaqeynayeen dowladda
Mareykanka, Dowladda Federaalka iyo Maamullada Jubbaland iyo Koonfur
Galbeed.
Saraakiisha Shabaab ayaa dadka u sheegay in raggan lagu hellay dhammaan
danbiyada lagu soo eedeeyay, kadibna lagu fuliyay xukunkii dilka ahaa oo lagu
xukumay.
Ragga Shabaabka ay toogteen ayaa waxa ay kala ahaayeen Mahad Cali Xasan oo
Al-shabaab ay sheegeen inuu la shaqeynayay ciidamada Bancroft ee Maraykanka uu
tababaray, Jibriil Saalax Xaaji Maxamed oo la shaqeynayay sirdoonka Dowladda
Federaalka, Mahad Cabdi Axmed oo 21 jir ahna wuxuu la shaqeynayay Sirdoonka
maamulka Jubbaland, Maxamed Cali Aadan oo la shaqeynayay dowladda iyo C/casiis
Ibraahim Maxamed uu la shaqeynayay maamulka Koonfur Galbeed.
Al-shabaab ayaa sidan oo kale dhowr jeer dilal toogasho ah ugu
fuliyay rag isugu jira caddaan iyo Soomaali, kuwaasi oo Al-shabaab ay ku
eedeeyeen in ay warar hoose u gudbinayeen Dowladda Federaalka iyo Dowladaha
Shisheeye.
C/raxmaan Diini, Hiiraan Online
[email protected]