C/raxmaan Faroole oo eedeyn u jeediyay Guddoonka Gollaha shacabka iyo Wasiirka Dastuurka
Axad, December, 24, 2017 (HOL)- Madaxweynihii hore ee maamul gobolleedka
Puntland Cabdiraxmaan Faroole oo ka mid ah xildhibaannada Aqalka sare
Cabdiraxmaan Maxamed Maxamuud Faroole oo warbaahinta kula hadlay Garoowe ayaa
eedeyn u jeediyay guddoonka sare ee baarlamaanka.
Waxaa uu eedayn kulul u jeediyey guddoonka golaha Shacabka Soomaaliya oo uu
sheegay in ay faro-gelin xooggan ku hayaan dowlad gobolleedka dalka, islamarkaana
ay burburinayaan nidaamka federaalka Soomaaliya.
‘’Waxaa lala dirirayaa nidaanka federaalka ah, waxaana qeyb ka ah dowladda
Federaalka qeybaheeda qeyb ka mid ah, gaar ahaan guddoonka shacabka oo siweyn
faragalin ugu haya nidaanka federaalka’’ ayuu yiri Faroole.
Waxaa uu sheegay in taasi ay tahay nasiib daro weyn , islamarkaana hadda aan
loo baahan yahay in dalka dib loo celiyo.
Dhinaca kale waxaa uu eedeyn ballaaran ujeediyay Wasiirka Dastuurka oo sida uu hadalka u yiri aan ku habooneyn
wasaaradda loo magacaabay.
Wasiir Xoosh ayuu ku eedeeyay in uu ahaa shaqsiggii markii horeba loo heystey
qaladaadka ku jira Dastuurka oo sida uu hadalka u dhigay uu ka dhigtay Buug
Jeebkiisa ah.
Hadalka Xildhibaan Faroole ayaa imanaya xili magaalada Garoowe uu ku soo
dhamaaday shirka arrimaha Dastuurka Wajigiisii saddexaad waxaana shirkaa
goobjoog ka ahaa wasiirka Dastuurka iyo wasiiradda maamul gobolleedyada xubnaha
ka ah dowladda dhexe.
Hay’adda Qaramada Midoobey ayuu ugu baaqay in ay si deg deg ah faraha kala
baxaan arimaha dastuurka.
C/raxmaan Diini,
Hiiraan Online
[email protected]
