Sawiro: Madaxweyne Farmaajo oo si kedis ah gelinkii dambe ee shalay ku tegay Xeebta Liido ee Muqdisho
Arbaco, Augusto, 30, 2017 (HOL) –Madaxweynaha Jamhuuriyadda Soomaaliya, Maxamed C/laahi Maxamed (Farmaajo), ayaa shalay gelinkii dambe la arkay isaga oo si caadi ah u dhexgalay dhallinyaro ku sugneyd Xeebta Liido ee Magaalladda Muqdisho.
Booqashada madaxweynaha ee xeebta ayaa waxaa ay aheyd mid lama filaan ah oo aysan ka warqabin warbaahinta Magaalladda Muqdisho.
Farmaajo, ayaa waxaa la arkayay isaga oo kubad la ciyaaraya dhallinyaro, waxaana sidoo kale uu ka wareystay xaaladda Magaalladda iyo hannaanka shaqada dowladda.
“Waxaan mar qura ka war helnay, askar badan oo xeebta soo buuxdhaafisay, kaddibna waxaan aragnay Farmaajo oo si caadi ah noogu yimid, waxaana uu noo sheegay in aan nabadda ka shaqeyno”, mid kamid ah dhallinyaradii Madaxweynaha la kulantay ayaa sidaasi Hiiraan Online u sheegay.
Ciidamada Ilaalada Madaxweynaha, ayaa sugaayay amnigiisa, iyadoona kolkii dambe uu Madaxweynuhu dib ugu laabtay Qasriga Madaxtooyada ee Villa Somalia.
Hiiraan Online,
Hassan Istiila
[email protected]
Mogadishu,Somalia
